Англия терма жамоаси ва Мюнхеннинг “Бавария” клуби ҳужумчиси Ҳарри Кейн фаолиятини Испания Ла Лигасида давом эттириши мумкин. Sport.es нашрининг хабарига кўра, футболчига “Барселона” жиддий қизиқиш билдирмоқда.
Манбада ёзилишича, футболчининг вакиллари Кейннинг келажаги бўйича турли вариантларни кўриб чиқмоқда. 2026 йил ёзида унинг “Бавария” билан тузган шартномасида кўрсатилган 65 миллион евролик товон пули бўйича банд кучга киради. Яъни, футболчини сотиб олмоқчи бўлган исталган клуб 65 миллион евро эвазига Кейнни харид қилиши мумкин. “Барселона”нинг расмий таклифи эса клубнинг молиявий имкониятларига боғлиқ бўлади.
Шунингдек, инглиз форвардига Англия Премьер Лигаси ва Саудия Арабистони клублари ҳам қизиқиш билдирган. Агар Кейн “Бавария”дан кетишни истаса, фаолиятини ушбу чемпионатлардан бирида давом эттириши мумкин.
32 ёшли Кейннинг “Бавария” билан амалдаги шартномаси 2027 йил 30 июнгача мўлжалланган. У жорий мавсум Бундеслигада 9 ўйинда майдонга тушиб, 12 та гол ва 3 та голли узатма муаллифига айланган. Кейн 2023-йилда “Тоттенҳэм”дан “Бавария”га ўтган ва шу вақт ичида немис клуби билан мамлакат чемпионлиги ҳамда Суперкубогини қўлга киритган. Англия терма жамоаси сафида эса икки марта Европа чемпионатида кумуш, Миллатлар Лигасида эса бронза медалини қўлга киритган.
