Англиянинг “Манчестер Сити” клуби бош мураббийи Хосеп Гвардиола жорий мавсум якунида жамоани тарк этиш имкониятини кўриб чиқмоқда. Бу ҳақда Mirror нашри хабар берди.
Манбага кўра, ҳозирги вақтда испаниялик мутахассиснинг “шаҳарликлар”даги келажаги бўйича якуний қарор қабул қилинмаган. Шу билан бирга, Гвардиола ва унинг штаби клубга янги мураббий топишда ёрдам беришга тайёр. Якуний қарорни эса фақат “Манчестер Сити” раҳбарияти қабул қилади.
Агар у “Сити”ни тарк этадиган бўлса, узоқ муддатли таътилга чиқишни мақсад қилган. Испаниялик мутахассис интервьюларининг бирида шундай деган эди:
“‘Сити’ билан шартномам якунлангач, бир оз муддат танаффус қилмоқчиман. Қанча вақт танаффус қиламан, билмайман — бир йил, икки йил, уч, беш, ўн, ўн беш… аниқ эмас. Лекин мен ўзимга, соғлиғимга эътибор қаратишим керак”, деди Гвардиола.
Эслатиб ўтамиз, 54 ёшли Гвардиола 2016-йилдан буён “Манчестер Сити”ни бошқариб келмоқда. Унинг амалдаги шартномаси 2027-йилгача мўлжалланган. Унинг бошқарувида клуб 2017-йилдан 2024-йилга қадар 6 марта Англия Премьер Лигаси ғолиблиги, Чемпионлар Лигаси, УЕФА Суперкубоги ҳамда Клублар ўртасидаги Жаҳон чемпионати каби мусобақаларда зафар қучган.
