Мадриднинг “Реал” клуби бош мураббий Хаби Алонсо билан муносабатлари совуқлашганига қарамай, ҳужумчи Винисиус Жуниор билан шартномани узайтириш ниятида. Бу ҳақда Football-Espana нашри хабар берди.
Манбага кўра, клуб раҳбарияти бразилиялик футболчи билан музокараларни давом эттиришни истамоқда. “Реал” кийиниш хонасида Винисиус ва Алонсо ўртасида алоқа яхши эмаслиги тасдиқланган бўлса-да, клуб футболчини жамоада олиб қолиш учун ҳаракатларни тўхтатмоқчи эмас.
Манбада ёзилишича, томонлар 2025-йилнинг бошида янги шартнома бўйича келишувга эришган, аммо бразилиялик ҳужумчи жамоанинг энг кўп маош олувчи футболчисига бўлишни истамоқда. Клуб раҳбарияти эса унинг талабларини қаноатлантирмоқчи эмас. Шундан кейин музокаралар тўхтаб қолган.
Аввалроқ Винисиус “Реал”дан кетиш имкониятини кўриб чиқаётгани ва агентига янги жамоа топиш бўйича топшириқ бергани маълум қилинганди. Шунингдек, унга “ПСЖ” клуби ҳам жиддий қизиқиш билдираётгани айтилганди.
Эслатиб ўтамиз, Винисиус Ла Лиганинг 10-тури доирасидаги “Барселона”га қарши ўйиннинг (2:1) 72-дақиқада алмаштирилди. Ҳужумчи мураббийнинг бу қарордан норози бўлган ва унга жиддий тарзда эътироз билдирган.
Жорий мавсумда Винисиус барча мусобақалар доирасида жами 19 та ўйинда майдонга тушиб, ўз ҳисобига 6 та гол ҳамда 5 та голли узатма ёздириб қўйган. Умуман олганда 25 ёшли бразилиялик футболчи 2018-йилдан бери “Реал” сафида тўп суради. У жамоа билан Испания чемпионатида уч карра, Чемпионлар Лигасида эса икки карра ғолиб бўлган. Винисиус “Реал” таркибида 335 ўйинда майдонга тушиб, ўз ҳисобига 111 та гол ва 87 та голли узатма ёздириб қўйган. Шу билан бирга, у Бразилия терма жамоаси сафида 43 та ўйинда 8 та гол ва 7 та ассист қайд этган.
