Мадриднинг “Реал” клуби ҳужумчиси Винисиус Жуниор фаолиятини Англия Премьер Лигасида давом эттириши мумкин. Fichajes нашрининг ёзишича, унга “Манчестер Юнайтед” жиддий қизиқиш билдирмоқда.
Унга кўра, манкунианликлар футболчи 200 миллион евро тўлашга тайёр эканлигини билдирган. “Реал” эса “Манчестер Юнайтед” билан музокара бошлашга тайёр. Чунки бразилиялик вингер “қироллик клуби” билан янги шартнома бўйича келишувга эриша олмаяпти. Винисиус мадридликлар сафида энг кўп маош олувчи футболчи бўлишни истамоқда. Аммо клуб раҳбарияти унинг талабларини қаноатлантирмоқчи эмас. Инглизлар эса мазкур ҳолатдан фойдаланиб, футболчини ўз сафига қўшиб олишни режалаштирмоқда. Винисиус ҳозирча келажаги бўйича бир қарорга келмаган. Аммо “Реал”дан кетса, Англия Премьер Лигаси клубларидан бири билан шартнома имзолаши эҳтимоли юқори эканлиги айтилмоқда.
Аввалроқ Винисиус Жуниорга “Манчестер Сити” клуби қизиқиш билдираётгани ҳақида хабарлар тарқалган эди. Унга кўра, “шаҳарликлар” устози Пеп Гвардиола футболчини жамоага олиб келишни истамоқда.
Маълумот учун, жорий мавсум бразилиялик футболчи “Реал Мадрид” сафида жами 14 та ўйинда майдонга тушиб, 5 та гол ва 4 та голли узатма муаллифи бўлган. Унинг клуб билан шартномаси 2027 йил ёзигача амал қилади. Transfermarkt портали Винисиуснинг қийматини 150 миллион еврога баҳоламоқда.
