Мадриднинг “Реал” клуби ҳужумчиси Винисиус Жуниор “Барселона”га қарши ўйин вақтида алмаштирилгач, жамоани тарк этиш истагини билдирган. Бу ҳақда Marca нашри DAZN маълумотларига таяниб хабар берди.
Манбага кўра, бразилиялик футболчи 72-дақиқасида алмаштирилгач, Хаби Алонсога кескин эътироз билдирган. Майдон четидаги техник зонада Родриго майдонга тушишга тайёрланар экан, Винисиус бунга ҳайрон бўлиб, бир неча бор: “Менми? Мен?” дея Хаби Алонсога мурожаат қилган. Алмаштирилаётгани тасдиқланган заҳоти Винисиус ўзини тута олмай, йўлакда: “Мен жамоани тарк этаман. Бу ердан кетганим маъқул”, деган сўзларни бир неча бор такрорлаган.
Аввалроқ, оммавий ахборот воситаларда Винисиус ва “Реал Мадрид” раҳбарияти янги шартнома бўйича келиша олмаганини ҳақида хабарлар тарқалган эди. Чунки бразилиялик форвард клубнинг энг кўп маош оладиган футболчига айланишни истамоқда. Аммо раҳбарият унинг истакларини қаноатлантирмоқчи эмас. Шу боис футболчи ҳамда раҳбарият ўртасидаги муносабатларга совуқчилик тушган.
Маълумот учун, Винисиус Жуниор 2018-йилнинг ёзидан бери “Реал” сафида тўп суради. Шу пайтгача у “қироллик клуби” билан уч карра Испания чемпиони, икки карра Чемпионлар Лигаси ғолиби бўлган. Футболчининг амалдаги шартномаси 2027-йилнинг ёзига қадар мўлжалланган.
Жорий мавсум Винисиус Жуниор барча мусобақалар доирасида жами 13 та ўйинда майдонга тушиб, ўз ҳисобига 5 та гол урган ва 4 та голли узатма ёздириб қўйган. Transfermarkt портали футболчининг қийматини 150 миллион еврога баҳоламоқда.
