Мадриднинг “Реал” клуби ҳужумчиси Винисиус Жуниорнинг манфаатларини ҳимоя қилувчи агент Федерико Пена бразилиялик футболчи ҳали камида ўн йил юқори даражада тўп тепа олишини мумкинлиги ҳақида гапирди.
“Винисиус дунёнинг энг яхши футболчиси деб эътироф этилган. Уни қатъият, меҳнатсеварлик ва мухлислар ҳурматини қозонган футболчи деб биламан. Вини яна камида ўн йил, балки ундан ҳам узоқ вақт давомида юқори даражада ўйин намойиш қила олади деб ўйлайман”, дея агентнинг сўзларини келтирди Marca нашри.
Маълумот учун, жорий мавсум 25 ёшли Винисиус “Реал” сафида жами 10 та ўйинда майдонга тушиб, ўз ҳисобига 5 та гол ва 4 та голли узатма ёздириб қўйган. Ҳужумчи “қироллик клуби”да 2018-йилги мавсумдан буён тўп сурмоқда. Унинг мадридликлар билан шартномаси 2027-йилнинг ёзига қадар амал қилади.
Эслатиб ўтамиз, Винисиус 2024-йилда The Best томонидан йилнинг энг яхши футболчиси мукофотига сазовор бўлган эди.
