Шавкат Мирзиёевнинг таклифига биноан Финляндия президенти Александр Стубб 29 октябрь—1 ноябрь кунлари расмий ташриф билан Ўзбекистонда бўлади.
Президент матбуот хизматининг хабар қилишича, Тошкент шаҳрида олий даражадаги музокаралар бўлиб ўтади. Уларда икки давлат ўртасидаги ҳамкорликни, энг аввало, сиёсий, савдо-иқтисодий, инвестициявий ва маданий-гуманитар соҳаларда янада кенгайтириш масалалари кўриб чиқилади.
Ўзаро савдо ҳажмини ошириш, қишлоқ хўжалиги, экология, кимё, энергетика, рақамлаштириш, тоғ-кон саноати ва бошқа инновацион тармоқларда кооперацияни йўлга қўйишга алоҳида эътибор қаратилади. Меҳнат миграцияси, маданият, таълим тизимига илғор технологияларни жорий этиш соҳаларида ҳамкорлик масалалари кўриб чиқилади.
Халқаро аҳамиятга молик долзарб масалалар, шу жумладан, кўп томонлама тузилмаларда ўзаро қўллаб-қувватлаш юзасидан ҳам фикр алмашилади.
28 октябрь куни Ўзбекистонга Сербия президенти Александр Вучич ташриф буюрганди. Икки давлат президентининг расмий делегациялар иштирокида музокаралари бўлиб ўтди ва унинг якунида Қўшма декларация ва икки давлат ҳамкорлиги бўйича 10 дан ортиқ ҳужжатлар имзоланди.
