Туркия аэропортида 61 килодан ортиқ олтинни яширинча олиб ўтмоқчи бўлган 5 нафар ўзбекистонлик қўлга олинди. Бу ҳақда Haber Turk нашри хабар берди.
Маълум қилинишича, улар Ўзбекистондан Истанбул орқали Каппадокия вилоятининг Невшехир аэропортига учиб келган. Текширув давомида ушбу шахсларнинг багажларидан 61 килограмм 121 грамм олтин аниқланган. Қимматбаҳо металл гўшт қиймалагичлар ичига эҳтиёт қисмлар шаклида эритилиб жойлаштирилган.
Невшехир вилояти полициясининг контрабанда ва уюшган жиноятчиликка қарши кураш бўлими ходимлари гумондорлар ҳақида аввалдан маълумотга эга бўлган. Аэропортда уларни кутиб олиш учун келган шахс ҳам қўлга олинган. Қўлга олинганларнинг 3 нафари аёллар бўлган. Гумондорларнинг барчаси полиция идорасида сўроқ қилинганидан сўнг судга юборилган.
Олтинларнинг бозор қиймати тахминан 350 миллион турк лирасига (тахминан 833 минг доллар) тенг бўлган.
