Ўзбекистонда 2025 йил январь–сентябрь ойларида ўртача ойлик номинал (солиқ ва бошқа тўловларни ўзи ичига олган) ҳисобланган иш ҳақи 6 миллион 166 минг сўмни ташкил этиб, ўтган йилнинг мос даврига нисбатан 19,2 фоизга ўсди.
Миллий статистика қўмитаси маълумотларида келтирилишича, ҳудудлар бўйича ўртача ойлик иш ҳақининг энг юқори кўрсаткичи доимгидек, Тошкент шаҳрида кузатилган — 10,3 млн сўм. Бу ўтган йилнинг мос даврига нисбатан 18,7 фоизга кўп. Кейинги ўринларда Навоий (7,6 млн сўм), Тошкент (5,8 млн сўм), Андижон (4,9 млн сўм) ҳамда Бухоро (4,9 млн сўм) вилоятлари қайд этилган.
Энг кам ўртача иш ҳақи Наманган (4,5 млн сўм), Сурхондарё (4,3 млн сўм), Қашқадарё (4,2 млн сўм) вилоятларида кузатилган.
Ўртача ойлик номинал иш ҳақи иқтисодий фаолият турлари бўйича таҳлил қилинганда эса энг юқори ўсиш суръатлари санъат, кўнгил очиш ва дам олиш соҳасида қайд этилди. Хусусан, мазкур соҳада 2024 йилнинг мос даврига нисбатан ўсиш суръати 122,8 фоизни ташкил этиб, иш ҳақи миқдори 5 млн 114,7 минг сўмга етгани кузатилди.
Шунингдек, таълим йўналишида ҳам сезиларли ўсиш қайд етилиб, иш ҳақи миқдори 4,1 млн сўмни ташкил этди (ўсиш — 19,8 фоиз). Ташиш ва сақлаш соҳасида ўртача иш ҳақи 9,3 млн сўмни ташкил этиб, 16,7 фоизга, ахборот ва алоқа соҳасида эса 14,9 млн сўмга етди (16,6 фоиз ўсиш). Саноат соҳасида ўртача иш ҳақи 7,3 млн сўмни ташкил этиб, 16,3 фоизга ошгани қайд этилди.
Шу билан бирга, қурилиш соҳасида ўртача ойлик иш ҳақи 6 млн 342,6 минг сўм бўлиб, ўтган йилнинг мос даврига нисбатан 9,2 фоизга ошди. Яшаш ва овқатланиш бўйича хизматлар соҳасида бу кўрсаткич 5 млн 122,8 минг сўмни ташкил этиб, 10,1 фоизга, савдо соҳасида 6 млн 875,6 минг сўмни ташкил этиб, 12,1 фоизга, соғлиқни сақлаш ва ижтимоий хизматлар йўналишида 3 млн 765,4 минг сўмни ташкил этиб, 14,6 фоизга ошди. Банк, суғурта, лизинг, кредит ва воситачилик фаолияти соҳасида эса ўртача ойлик иш ҳақи 16 млн 828,9 минг сўмни ташкил этиб, 15,6 фоизга ўсди.
