“Барселона” ҳужумчиси Роберт Левандовски жароҳат туфайли “Реал Мадрид”га қарши бўлиб ўтадиган ўйинда иштирок эта олмайди. Бу ҳақда клубнинг расмий сайти хабар берди.
Маълум қилинишича, Левандовски Польша терма жамоаси сафида чап сони мушагини шикастлаб олган. Футболчининг сафга қайтиш муддати ҳозирча номаълум. Бироқ хорижий манбаларга кўра, у 4–6 ҳафта майдга туша олмаслиги мумкин. Агар бу тахминлар тасдиқланса, у ҳолда Левандовски 26 октябрь куни бўлиб ўтадиган “Эл-Класико”да иштирок эта олмайди.
Шунингдек, “Барселона” сафида бошқа бир қатор футболчилар — Рафинья, Гави, Дани Ольмо, Жоан Гарсия ва Тер-Штеген ҳам “Реал Мадрид”га қарши учрашувни ўтказиб юбориши кутилмоқда.
Левандовски “Барселона”га 2022-йилда келган. Унинг клуб билан тузган шартномаси 2026 йил ёзигача амал қилади. Жорий мавсумда у барча мусобақалар доирасида 9 та учрашувда майдонга тушиб, 4 та гол уришга муваффақ бўлган. Transfermarkt портали футболчининг қийматини 10 миллион еврога баҳоланмоқда.
Маълумот учун, айни вақтда “Барселона” 19 очко билан Испания Ла Лигаси турнир жадвалида 2-ўринда бормоқда. Каталонияликлар 21 очкога эга “Реал Мадрид”дан 2 очкога ортда қолмоқда. Улар ўртасидаги навбатдаги тўқнашув 26 октябрь куни Мадриднинг “Сантиаго Бернабеу” стадионида бўлиб ўтади.
