Миср президенти Абдулфаттоҳ ас-Сиси мамлакатнинг энг олий “Нил” орденини АҚШ президенти Дональд Трампга топширади. Бу ҳақда ас-Сисининг матбуот котиби Аҳмад Фаҳмий маълум қилди.
Унинг таъкидлашича, орден Трампнинг Фаластин—Исроил можаросини ҳал этишдаги ҳиссасини эътироф этиш учун берилмоқда.
Президент Абдулфаттоҳ ас-Сиси тинчлик ўрнатиш саъй-ҳаракатларини қўллаб-қувватлагани, можародаги кескинликни юмшатгани ва айниқса, Ғазодаги урушни тўхтатишдаги ҳал қилувчи роли учун АҚШ президентига “Нил” орденини топширишга қарор қилди, дейилади хабарда.
Шунингдек, Исроил ҳам Трампни ўзининг олий давлат мукофоти билан тақдирлашни режалаштирмоқда. АҚШ воситачилигида эришилган Исроил ва ҲАМАС ўртасидаги сулҳ 10 октябрь кечаси соат 00:00 дан кучга кирди. Тинчлик режасининг биринчи босқичи 9 октябрь куни Мисрнинг Шарм аш-Шейх шаҳрида имзоланган эди. Ўт очишни тўхтатиш режими ўрнатилгач, Исроил ўз қўшинларини Ғазо буфер зонасига олиб чиқди ва фаластинликлар ўз уйларига қайта бошлади.
Келишувларга кўра, ҲАМАС қўшинлар олиб чиқилгандан кейин 72 соат ичида гаровдагиларни озод қилиши шарт. Охирги муддат 13 октябрь куни маҳаллий вақт билан туш пайтига белгиланган. Шу куни Ғазо секторида урушни тўхтатиш бўйича Мисрда саммит ўтказилади. Унга АҚШ президенти Дональд Трамп, Буюк Британия бош вазири Кир Стармер, Франция раҳбари Эммануэл Макрон ташриф буюради. Бироқ Исроил ва ҲАМАС вакиллари тадбирда қатнашмайди.
“Нил” ордени — Мисрнинг олий давлат мукофоти бўлиб, 1915 йилда Султон Ҳусайн Комил томонидан таъсис этилган. У мисрликларни ҳам, чет эл фуқароларини ҳам мамлакат олдидаги ҳарбий ва фуқаролик хизматлари учун мукофотлашга мўлжалланган.
