Исроил Бош вазири Биньямин Нетаньяху АҚШ президенти Дональд Трампнинг ҲАМАС тинчликка тайёр эканини ва яҳудий давлати Ғазо секторини бомбардимон қилишни тўхтатиши кераклиги ҳақидаги баёнотидан ҳайратда қолди. Бу ҳақда X ижтимоий тармоғида АҚШнинг Axios интернет-портали журналисти Барак Равид манбаларга таяниб маълум қилган.
Унинг манбасига кўра, Нетаньяху ҲАМАСнинг жавоби аслида “Трамп режасини рад этиш” деб ҳисоблаган.“Исроиллик амалдор таъкидлаганидек, Нетаньяху Президент Трампнинг жавобидан ҳайратга тушди”, дея ёзади мухбир.
Журналистнинг аниқлаштиришича, Исроил Бош вазири бу нуқтаи назарни Трампнинг баёноти эълон қилинишидан олдин АҚШ томони билан ўтказилган маслаҳатлашувларда билдирган. Манбанинг айтишича, Нетаньяху ушбу маслаҳатлашувлар давомида “АҚШ билан уларнинг жавоб чораларини келишиб олиш зарурлигини” таъкидлаган.
Бундан олдин Трамп Truth Social тармоғида ҲАМАС ҳаракати “барқарор тинчликка тайёр” эканини ёзган эди. Америка раҳбарининг қўшимча қилишича, “гаровга олинганларни тез ва хавфсиз олиб чиқиш учун Исроил Ғазони бомбардимон қилишни дарҳол тўхтатиши керак”.
ҲАМАС Трамп режасига мувофиқ барча асирларни озод қилишга тайёрлигини маълум қилди.
Шунингдек, ҳаракат Ғазо секторини бошқаришни фаластинлик технократлардан иборат мустақил ҳокимият органига топширишга рози бўлган.
3 октябрь куни Трамп, агар ҲАМАС 5 октябрь кечгача унинг тинчлик режаси шартларини қабул қилмаса, “мисли кўрилмаган дўзах” билан таҳдид қилган.
