Украина президенти Владимир Зеленский Исроил ва ҲАМАС ўртасида эришилган сулҳни “мисли кўрилмаган” деб атади. У бу сулҳ бошқа минтақаларда, хусусан, Украинада ҳам урушга барҳам беришга умид уйғотганини таъкидлади.
“Дунёнинг бир нуқтасида тинчлик ўрнатилиши — бошқа жойларда ҳам бундай имконият борлигини кўрсатади”, деб ёзган Зеленский ижтимоий тармоқлардан бирида.
Унга кўра, Яқин Шарқда сулҳга эришилган бўлса, глобал етакчилар ва уларнинг қатъияти Украина учун ҳам ижобий натижа олиб келиши мумкин.
“Умид қиламанки, президент Трамп Яқин Шарқда тинчлик ўрнатиш учун қўллаган бундай тактикани Путинга ҳам қўллайди ва Украинадагу уруш тўхтатилади”, деган Зеленский Fox News нашрига берган интервьюсида.
Украина президенти Трамп билан 12 октябрь куни телефон орқали мулоқот қилган. Суҳбатда икки раҳбар Украинанинг ҳаво ҳужумидан мудофааси, шунингдек, узоқ масофага учувчи қуроллар ҳақида сўзлашган. Бундан ташқари, Вашингтоннинг Киевга “Tomahawk” ракеталарини етказиб бериш масаласи ҳам кўриб чиқилган.
Германия канслери ҳам Трампдан умид қилмоқда
Айни пайтда, Германия канслери Фридрих Мерс ҳам АҚШнинг Украинадаги урушни ҳал этишда фаол бўлиши кераклигини таъкидламоқда. У Трампнинг Ғазо тинчлик сулҳида муҳим рол ўйнаганини юқори баҳолаб, бундай ёндашув Украинага ҳам фойда келтиришига умид билдирган. Мерс бу фикрларини Мисрнинг Шарм аш Шайх шаҳрида, Ғазо бўйича саммит арафасида билдирган.
“Мисрдаги учрашув шуни кўрсатадики, урушни тўхтатиш мумкин. Бунинг учун халқаро ҳамжамият бир ёқадан бош чиқариши керак”, деган у.
