Мадриднинг “Реал” клуби ҳужумчиси Родриго Гоэс “Барселона”га қарши бўладиган навбатдаги “Эл-Класико” олдидан ўз фикрларини билдириб ўтди. Бу ҳақда АS нашри хабар берди.
“Ўтган мавсумдаги натижаларни унутиш керак. Айниқса, “Эл-Класико”ларда биз ўз даражамиздан анча паст ўйин намойиш қилдик. “Барселона”га қарши ўйинларда ўзимизни ноқулай ҳис қилганмиз. Уларни тан олиш керак, ҳозирда улар биздан кучлироқ, анча ишончли ва жипс жамоа бўлиб турибди.
Аммо бизда ҳам кучли жамоа бор. Олдимизда жуда қийин ўйин турибди, лекин биз ўз уйимизда — “Сантьяго Бернабеу”да ўйнаймиз. Мухлисларимиз олдида ўз кучимизни кўрсатишимиз керак. Қандай бўлмасин, бу ўйинга ғалаба қозонишга ҳаракат қиламиз”, дейди Родриго Гоэс.
Маълумот ўрнида, Родриго ҳозирда Бразилия терма жамоаси билан Сеулда машғулот ўтказмоқда. Карло Анчелотти бошчилигидаги “пентакампеонлар” октябрь ойидаги FIFA кунларида Жанубий Корея ҳамда Японияга қарши ўртоқлик учрашуви ўтказиши кутилмоқда.
Эслатиб ўтамиз, “Реал” ҳамда “Барселона” ўртасидаги баҳс 26 октябрь куни бўлиб ўтади. Ла Лиганинг 10-туридан ўрин олган беллашув Мадриддаги “Сантиаго Бернабеу” стадионида бўлиб ўтади.
