Сурхондарёда фарзандларига алимент тўламаган ота 1 йилга озодликдан маҳрум этилди. Бу ҳақда “Миллий” телеканалида хабар қилинди.
Қайд этилишича, Жарқўрғон туманида ота 2 нафар фарзанди учун алимент пулини тўламай юриб, дастлаб 15 суткага қамалган, аммо фуқаро жазодан хулоса чиқармаган.
Ҳолат юзасидан навбатдаги суд мажлисида эса ушбу шахс Жиноят кодексининг 127-моддаси 1-қисми билан айбдор деб топилди ва 1 йил муддатга озодликдан маҳрум этилди. Шунингдек, пуллар даъвогар фойдасига ундирилиши белгиланди.
Аввалроқ Самарқандда алимент тўлашдан қочиб юрган ота уйида шкаф ичидан топилганди. Ушбу шахс фарзандлари учун 60 миллион сўмдан ортиқ алимент пулларини тўламай келган.
Бошқа бир ҳолатда эса Наманганда жорий йилда 8,7 миллиард сўмлик алимент МИБ орқали ундирилгани хабар қилинганди.
