Тошкент вилоятининг Зангиота туманида юк машинаси кўприкка урилиб, тўхтаб қолди. Ушбу ҳолатга вилоят ИИББ ЙҲХБ матбуот хизмати муносабат билдирди.
Қайд этилишича, жорий йилнинг 26 сентябрь куни соат 19:00 ларда Тошкент вилояти Зангиота туманида юк машинаси ҳайдовчиси тақиқловчи белгига амал қилмай, габарит ўлчамлари тўғри келмаган транспорт воситасида кўприкнинг пиёдалар ҳаракатланиши учун мўлжалланган қисмидаги бетон тўсинга келиб урилган.
Воқеа жойига йўл ҳаракати хавфсизлиги ходимлари етиб келиб, юзага келган ҳолатни бартараф қилишган.
Ушбу ҳолатда ҳаракат иштирокчиларининг соғлиғига ва кўприкнинг автомобиллар ҳаракатланиш учун мўлжалланган қисмига зиён етмагани, кўприкнинг пиёдалар ҳаракати учун мўлжалланган қисми шикастлангани маълум қилинди.
Ҳозирда кўприкнинг шикастланган қисмини таъмирлаш чоралари кўрилмоқда. Шунингдек, автомобилларнинг эркин ҳаракатланиши тўлиқ йўлга қўйилди. Шунингдек, ҳолат юзасидан суриштирув ишлари олиб борилмоқда.
