Сохта ходимлар фуқарони 170 минг долларга “туширди”. Бу ҳақда омбудсман ахборот хизмати хабар қилди.
Маълум бўлишича, фуқаро М.П. 2024 йил декабрь ойида ўзини Ички ишлар, Давлат хавфсизлик хизмати ва Марказий банк ходими деб таништирган шахслар таъсирида 170 000 АҚШ долларига чув тушган.
Фуқаро сохта ходимларга ишониб, автомашинаси ва уйини сотган, жамғармаларини йўқотган, ҳатто қарзга кирган. У пулларидан криптовалюта орқали айрилган.
Ўтган йилнинг декабрь ойида фуқаронинг мурожаатига асосан жиноий иш қўзғатилган ва у жабрланувчи сифатида тан олинган. Омбудсман шикоятда кўрсатилган важларга аниқлик киритиш мақсадида Ички ишлар вазирлигига мурожаат қилди.
Натижада, Киберхавфсизлик бошқармаси томонидан криптодўкондан фуқаро М.П. фойдасига 115 минг доллар ундирилишига эришилган.
“Ўзини ҳуқуқни муҳофаза қилувчи орган ёки банк ходими деб таништирган, аммо шахсий рақамлар орқали қўнғироқ қилаётган, тўлов ёки маълумот сўраётган шахсларга ишонманг”, дейилади хабарда.
