Москвадаги Ф.I.Иноземсев номидаги шаҳар клиник касалхонаси шифокорлари бошидан пичоқ жароҳати олган 52 ёшли эркакни қутқариб қолишди. Бу ҳақда пойтахт соғлиқни сақлаш департаменти матбуот хизмати маълум қилди.
Маълум қилинишича, бемор тез ёрдам машинасида тиббиёт муассасасига келтирилган. У жанжал пайтида бошига пичоқ санчилганини айтган. Пичоқ тиғининг бир қисми синиб, уйқу артерияси ёнидаги жароҳатга тиқилиб қолган.
“Текширувлар натижасига кўра, беморда пневмоцефалия белгилари ва чап томондаги понасимон суяк қаноти металл парчаси билан синганлиги аниқланди”, дея тушунтирди шифохона вакили.
Эркакнинг қўшимча текширувлар ўтказиш учун касалхонага ётқизилган. Тиббий консилиум хулосасига кўра, синган бўлакнинг кўчиб, йирик қон томирларини иккиламчи шикастлаш хавфини ҳисобга олган ҳолда, ёт жисмни олиб ташлаш бўйича операция ўтказишга қарор қилинди.
“Пичоқнинг тиғи ички уйқу артерияси ва юз нервига жуда яқин жойлашганди. Озгина хато энг ёмон оқибатларга олиб келиши мумкин эди. Бироқ, текширувлар натижасида пичоқ уйқу артериясига тегмагани ва уни хавфсиз олиб ташлаш мумкинлиги аниқланди”, дея қўшимча қилди шифохона вакили.
Жарроҳлик амалиёти муваффақиятли ўтган ва бир неча кундан сўнг эркак соғ-саломат ҳолда уйига жавоб берилган.
Бундан аввал Бухоро вилояти Қоракўл туманида 2 ёшли бола тангаларни ютиб юборгани аниқланди. 2025 йилнинг январида фарғоналик 2 ёшли қизалоқнинг қорнидан 135 та магнит шарча чиқариб олинганди. Ўша ойда қозоғистонлик жарроҳлар 4 ёшли боланинг ичакларидан 39 та магнит шарни олиб ташлаганди. 20 февраль куни Қозоғистоннинг Олмаота шаҳрида жарроҳлар икки ёшли боланинг ошқозонидан 105 дона магнитли мунчоқни чиқариб олгани хабар қилинганди.
