АҚШ президенти Дональд Трамп Украинадаги уруш тез орада якунланишига умид қилишини билдирди ва “буюк ҳафта” бошланаётганини таъкидлади. Бу ҳақда у ўзининг Х саҳифасида ёзди.
Россия ва Украина учун потенциал ажойиб кун! Бу тугамас қонли қирғин ниҳоясига етмоқда, деган умиддамиз. Юз минглаб инсонлар ҳаёти сақлаб қолинишини ўйланг. Бу мутлақо янги ва анча яхши дунё бўлади. Мен бу содир бўлиши учун ҳар икки томон билан ишлашда давом этаман. АҚШ эндиликда тикланиш ва савдога эътибор қаратмоқчи. Буюк ҳафта бошланмоқда!, деб ёзди АҚШ президенти.
Кеча Украина президенти Владимир Зеленский ва унинг Европадаги ҳамкорлари Россияни душанбадан бошлаб 30 кунлик сулҳга рози бўлишга чақирган эди. Шу билан бирга, улар агар Москва ўт очишни тўхтатишга рози бўлмаса, янги санкциялар билан таҳдид қилганди.
Путин эса бунга амалда рад жавобини бериб, 15 майдан Россия ва Украина ўртасида тўғридан-тўғри музокараларни тиклашни таклиф қилди.
Эътиборли жиҳат шундаки, Трамп Россиянинг сулҳга рад жавобини изоҳламади.
