Россия президенти Владимир Путин Украина билан тўғридан-тўғри музокараларни, ҳеч қандай олдиндан шартларсиз, 2022 йилда тўхтатилган жойда — Истанбулда, шу йилнинг 15 май куни қайта бошлашни таклиф қилмоқда. Бу ҳақда у 11 майга ўтар кечаси журналистлар билан суҳбатда айтиб ўтди.
“Биз музокараларни чўзмасдан, аввалги ўтказилган жой — Истанбулда, 15 май куни бошлашни таклиф қиламиз”, деган Путин.
Россия етакчисининг сўзларига кўра, эртага Туркия президенти Ражаб Тоййиб Эрдўғон билан телефон орқали суҳбат режалаштирилган бўлиб, бу суҳбат давомида у музокараларни ўтказиш имконияти масаласини муҳокама қилади.
Шу билан бирга, Владимир Путин Москва ҳеч қандай олд шартларсиз музокараларга тайёр эканини таъкидлаган.
“Биз Украина билан жиддий музокараларга тайёрмиз. Музокараларнинг асосий мақсади — можарони келтириб чиқарган асосий сабабларни бартараф этиш ва узоқ муддатли, барқарор тинчликка эришишдир”, деди у.
Путиннинг айтишича, бўлажак музокараларда янги ва ҳақиқий ўт очишни тўхтатиш бўйича келишувга эришиш эҳтимоли ҳам мавжуд.
“Бу музокаралар давомида янги ўт очишни тўхтатиш бўйича келишувга, яъни ҳақиқий сулҳ бўйича келишиб олиш мумкинлигини истисно қилмаймиз. Энди қарор Киев томонда”, дея қўшимча қилган Россия раҳбари.
