Сербия президенти Александр Вучич ва Словакия бош вазири Роберт Фицо 9 май куни Москвада бўлиб ўтадиган Ғалаба парадида иштирок этиши режалаштирилган. Шу муносабат билан Польша, Литва ва Латвия ушбу сиёсатчилар бўлган самолётларнинг ўз ҳаво ҳудуди орқали учишига рухсат бермади.
Сербиянинг “Новости” портали хабарига кўра, 6 май куни Литва ва Латвия ҳукуматлари Вучич бўлиши керак бўлган самолётнинг Россияга учиб ўтишига тўсқинлик қилган. Рига бу қарорни “парвоз мақсадининг сиёсий нозиклиги” билан изоҳласа, Вильнюс буни “техник ва дипломатик сабабларга” таяниб амалга оширган.
3 май куни Вучич соғлиғи ёмонлашгани сабаб АҚШдаги расмий ташрифини бекор қилганди ва Белграддаги ҳарбий тиббиёт академиясига ётқизилган эди. Сербия молия вазири Синиша Малининг айтишича, президентнинг Москвага бориши эҳтимолдан ҳоли эмас, бироқ бу борадаги қарор ҳали якуний эмас.
Шунингдек, Польша ва Литва Словакия бош вазири Фицо самолётининг ҳам Россияга парвозига чеклов қўйган. Бироқ Словакиянинг “Правда” нашри Фицо махсус рейс билан Москвага бориши учун керакли ҳужжатлар тайёрлангач, Польша парвозга рухсат берганини билдирган. Шунга қарамай, Польша ҳукумати Фицонинг ҳарбий парадда иштирок этишига салбий муносабатда эканини маълум қилган.
Россия президенти ёрдамчиси Юрий Ушаковнинг айтишича, Владимир Путин 9 май куни Москвада Вучич ва Фицо билан учрашишни режалаштирган. У Словакия бош вазири билан Украинадаги урушни, Сербия президенти билан эса Ғарбий Болқондаги вазиятни муҳокама қилади.
Москвадаги Ғалаба парадига жами 29 давлат, жумладан, Ўзбекистон, Қозоғистон, Қирғизистон, Тожикистон ва Туркманистон президентларининг ташрифи кутилмоқда.
