Шавкат Мирзиёев Ўзбекистон ва Германия ҳукуматлари ўртасида миграция ва мобиллик соҳасида кенг қамровли шериклик тўғрисидаги битимни тасдиқлади.
Ҳужжат 2024 йил 15 сентябрь куни Самарқандда Германия канцлери Олаф Шольцнинг ташрифи доирасида имзоланганди. Битимга кўра, Вазирлар Маҳкамаси ҳузуридаги Миграция агентлиги ташқи меҳнат миграцияси қисми бўйича, Ички ишлар вазирлиги эса реадмиссия қисми бўйича масъул бўлган ваколатли органлар этиб белгиланди.
Ташқи ишлар вазирлиги Ўзбекистон томонидан ушбу халқаро шартноманинг кучга кириши учун зарур бўлган давлат ички тартиб-таомиллари бажарилгани ҳамда уни амалга ошириш учун масъул бўлган ваколатли органлар тўғрисида Германия томонига тегишли билдиришнома юборади. Вазирлар Маҳкамаси ҳамда тегишли вазирлик ва идораларнинг раҳбарлари ушбу халқаро шартнома кучга киргандан кейин белгиланган тартибда унинг қоидалари амалга оширилиши устидан назоратни таъминлайди.
Камбағалликни қисқартириш ва бандлик вазирлиги маълумотларига кўра, “Миграция ва мобиллик соҳасида ҳар томонлама шериклик тўғрисида” ҳукуматлараро битим 25 та моддадан иборат бўлиб, томонлар ўртасида қуйидаги соҳаларда ҳамкорлик ўрнатиш ва ривожлантиришни кўзда тутади:
- икки давлат ҳудудида меҳнат фаолиятини амалга оширишни мақсад қилган малакали мутахассислар, шу жумладан, талабалар ва касбий таълим олаётган шахслар ҳамда журналистлар ва олимларнинг адолатли мобиллигини рағбатлантириш;
- меҳнат фаолиятини амалга ошириш мақсадида вақтинча миграцияни рағбатлантириш ва соддалаштириш;
- касбий таълим ва малака ошириш сабабига кўра, ҳамда меҳнат фаолиятини амалга ошириш мақсадида давлатда узоқ муддат бўлишни рағбатлантириш;
- ноқонуний миграция ва мигрантларни ноқонуний олиб киришнинг олдини олиш ва уларга қарши курашиш;
- меҳнат эксплуатацияси, мажбурий меҳнат ва одам савдоси олдини олиш ва уларга қарши курашиш ҳамда жабрланувчиларни ҳимоя қилиш.
Ҳужжат, шунингдек, икки давлат ҳудудида яшаш ёки кириш шартларини бажармаган фуқароларни қайтаришни соддалаштиришни ҳам назарда тутади.
2024 йил сентябрида Германия Ички ишлар ва Ватан вазири Ненси Фезер миграция масаласида бир қатор енгилликлар ишлаб чиқилаётганини маълум қилганди. Битим доирасида немис иш берувчилари учун ўзбекистонликларни соддалаштирилган тартибда ишга қабул қилишга тайёрлигини айтганди.
