ИИВ Жазони ижро этиш департаментининг Олмалиқдаги 14-сонли колониясидан 15 февраль куни 21 яшар маҳкум — Муҳаммадқодир Пўлатовнинг жасади чиқди. Бу ҳақда Инсон ҳуқуқлари бўйича “Эзгулик” жамияти раҳбари Абдураҳмон Ташанов Facebookда маълум қилди.
Маҳкумнинг Фарғона шаҳрида яшовчи онаси Нигора Қамбарованинг айтишича, у ўғли билан шу йилнинг 26—28 январь кунлари узоқ муддатли учрашувларда бўлган. Аёлнинг билдиришича, ўғли спортнинг ушбу йўналишида халқаро турнирлар ғолиби, болалигидан мазкур спорт тури билан шуғулланган. Бирор марта соғлиғидан шикоят қилмаган, унда бирор ёндош касалликлар кузатилмаган. Безориликда айбланиб, 3 йилга қамалган ёлғиз ўғли шу йил августида манзил колонияга чиқиши керак бўлган.
Аммо колония маъмуриятининг таъкидлашича, 14 февраль куни Муҳаммадқодирда миокард инфаркти ва панкреатитнинг оғир формаси кузатилиши оқибатида вафот этган. Унинг онаси фарзандининг баданида қийноқ излари мавжудлиги, электрошокер изига ўхшаш чизиқлар борлигини айтмоқда.
“Бизда шубҳа туғдирган ҳозирча ягона жиҳат колония маъмуриятининг маҳкумнинг оғир аҳволда шифохонага ётқизилгани ҳақида унинг яқинларига хабар бермаганлигидир”, деб ёзди Абдураҳмон Ташанов.
Мазкур ҳолат Инсон ҳуқуқлари бўйича вакили (омбудсман) томонидан назоратга олиниб, ҳолатга доир маълумотлар ўрганилмоқда.
