“Дарё”да Қашқадарё вилоятида МИБ ва унинг мансабдорлари, “Агробанк”, шунингдек, банкнинг вилоятдаги масъуллари билан судлашиб юрган тадбиркор-фермер қамоққа олингани ҳақида хабар берилганди. Вилоят прокуратураси фермернинг озод қилинганини маълум қилди.
Нишон туманидаги “С.Н.” фермер хўжалиги раҳбари Б.А. ва “И.Н.” фермер хўжалиги раҳбари Ш.Ш.га нисбатан 2024 йилнинг 11 октябрь куни Жиноят кодексининг 167-моддаси 2-қисми “а” банди билан жиноят иши қўзғатилган. Жиноят иши қўзғатилишига “С.Н.” фермер хўжалиги раҳбари Б.А. АТБ “Агробанк” Нишон филиали билан тузилган кредит шартномасига асосан пахта хом-ашёси етиштириш мақсадида ажратилган 371 миллион сўмлик имтиёзли кредит маблағларининг 162 миллион сўмини талон-торож қилганлиги сабаб бўлган. Иш бўйича 29 октябрь куни Б.А.га айблов эълон қилиниб, “қамоққа олиш” тарзидаги эҳтиёт чорасини қўллаш ҳақида ЖИБ Нишон тумани судига илтимоснома киритилган, дейилади вилоят прокуратураси ахборотида.
Таъкидланишича, айбланувчи Б.А. томонидан етказилган зарар тўлиқ қопланганлиги сабабли у 31 октябрь куни суд томонидан муносиб хулқ-атворда бўлиш ҳақидаги тилхат эҳтиёт чораси билан озод қилинган. Дастлабки тергов ҳаракатлари давом эттирилмоқда.
