Ўзбекистон Олий суди ахборот хизмати раҳбари Азиз Абидов мамлакат судлари аксарият хорижий мамлакатлар судларига нисбатан анча очиқ ва кириб-чиқиш қулай эканини айтди. Бу ҳақда у Паркент туманида Олий суд, АОКА, Миллий масс-медиани қўллаб-қувватлаш ва ривожлантириш жамоат фонди ҳамда USAID ҳамкорлигида бўлиб ўтаётган “Оммавий ахборот воситаларида судлар фаолиятини ёритиш: қонун талаби ва масъулиятли ёндашув” мавзусидаги семинар-тренингда гапирди.
“Очиқ ва ёпиқ судлар ҳақида гап кетганда бир жумлани ишлатаман: мен юз фоиз масъулият билан айтаманки, Ўзбекистон судлари бошқа хорижий давлатлар судларига нисбатан таққослаганда улардан сал очиқроқ”, деди Олий суд раисининг матбуот котиби.
У семинарда ОАВ вакиллари билан мулоқот қилар экан, дам олишга ёки бирор бир иш билан хорижга чиқаётган журналистларга ўша давлатнинг судларида бўлиб, кириб-чиқиш ва судларни ёритиш борасида қизиқиб кўришни тавсия қилди.
“Сизлардан битта илтимос, агар хорижга иш билан ёки дам олишга борсангиз, судлари билан қизиқиб, кириб-чиқиш қандайлигини билинг. Кейин қайтиб келгач, гапириб берасиз”, дейди у.
Масъулнинг таъкидлашича, Ўзбекистон судларининг очиқлиги бошқа давлат судларининг очиқлигидан анча устун.
Азиз Абидовнинг эслатишича, Ўзбекистондаги барча судлар очиқ. Фақатгина давлат сири ва жинсий зўравонлик билан боғлиқ ишларгина ёпиқ тарзда кўрилади.
