Ўзбекистон 23 декабрь куни Афғонистонга навбатдаги инсонпарварлик ёрдамини юборди, деб хабар бермоқда Сурхондарё вилояти ҳокимлиги матбуот хизмати.
Маълум қилинишича, 63 вагонда озиқ-овқат, кийим-кечак ҳамда кўмир маҳсулотларидан иборат навбатдаги инсонпарварлик ёрдами ортилган поезд Термиздаги «Айритом» чегара ўтказиш пункти орқали Афғонистоннинг Мозори Шариф шаҳрига жўнатилди.
Шу муносабат билан бугун, 23 декабрь куни Балх вилояти марказида икки мамлакат расмийлари иштирокида инсонпарварлик ёрдамини топшириш маросими бўлиб ўтади.
Эслатиб ўтамиз, Ўзбекистон Афғонистонга бундан аввалги инсонпарварлик ёрдамини 14 сентябрь куни юборганди. Ун, турли озиқ-овқат маҳсулотлари, бирламчи зарур товарлар, дори-дармонлар, кийим-кечак ва пойабзаллардан иборат 1300 тонналик мазкур ёрдам бутун мамлакат бўйлаб кам таъминланган афғон оилаларига тарқатилган.
БМТ Қочқинлар ишлари бўйича олий комиссари бошқармаси 15 декабрь куни Термиз орқали Афғонистонга гуманитар ёрдам жўнатганди. Мавзуга доир:- «Афғонистондаги вазият бўйича қуруқ сўздан амалий ишларга ўтиш вақти келди» — Абдулазиз Комилов
- Шавкат Мирзиёев: «Мувофиқлаштирилган самарали чоралар кўрилмаса, Афғонистон узоқ вақт минтақавий хавфсизликка янги таҳдидлар манбаси бўлиб қолиши мумкин»
- «Афғонистонни яккалаб, уни муаммолар гирдобига ташлаб қўйиш мумкин эмас» — Шавкат Мирзиёев БМТ Бош Ассамблеясида Афғонистон муаммоси ҳақида гапирди
