Шавкат Мирзиёев 10 сентябрь куни «Божхона тартиб-таомилларини соддалаштириш ва давлат божхона хизмати органлари ташкилий тузилмасини янада такомиллаштириш тўғрисида»ги фармонни қабул қилди, деб хабар бермоқда Адлия вазирлиги матбуот хизмати.
Фармон билан 2021 йил 1 октябрдан Тошкент, Сирдарё, Қашқадарё ва Хоразм вилоятлари божхона бошқармаларида, 2022 йил 1 апрелдан эса бошқа ҳудудий бошқармаларда тоифадан ташқари мақомга эга бўлган «Масофавий электрон декларациялаш» божхона постлари босқичма-босқич ташкил этилади.
2021 йил 1 октябрдан «Масофавий электрон декларациялаш» постлари ташқи иқтисодий фаолият (ТИФ) иштирокчиларининг электрон божхона юк декларацияларини масофавий расмийлаштиради.
Ҳужжатга асосан қуйидаги божхона постлари тугатилади:- Қорақалпоғистон Республикаси «Найманкўл» темир йўл чегара божхона пости;
- Қашқадарё вилояти «Қарши тола» ТИФ божхона пости, «Қарши» темир йўл чегара божхона пости;
- Сурхондарё вилояти «Амузанг» темир йўл чегара божхона пости;
- Фарғона вилояти «Бешариқ» темир йўл чегара божхона пости, «Ўқчи» чегара божхона пости.
2022 йил 1 январдан ортиқча тўланган ёки ундирилган божхона тўловлари ТИФ иштирокчисига 3 иш куни давомида қайтарилади. Шу билан бирга, божхона тўловларини кечиктириб ёки бўлиб-бўлиб тўлашнинг энг кам муддати 14 кун этиб белгиланади ва ушбу муддатда фоизлар ундирилмайди.
Фармонга мувофиқ, Давлат божхона қўмитаси тизимида Марказий божхона лабораторияси ташкил этилади. Лаборатория Жаҳон божхона ташкилотининг «Минтақавий божхона лабораторияси» мақомини олиш чоралари кўрилади.
Лаборатория никотин сақловчи маҳсулотлар ва спиртли ичимликлар таркибини аниқлаш, товарларни экспертизадан ўтказиш ва сертификациялаш билан боғлиқ бошқа хизматларни кўрсатади.Мавзуга доир: Тошкент вилоятидаги «Ғишткўприк» чегара постида талон-торожлик қилаётган уюшган гуруҳ борлиги айтилмоқда
