Самарқанд вилояти Ургут туманида террористик ташкилотга аъзо бўлган шахслар аниқланди, дея хабар бермоқда вилояти ИИБ матбуот хизмати.
Самарқанд вилояти ДХХ ва ИИБ ходимлари томонидан амалга оширилган тезкор тадбирлар натижасида Самарқанд вилояти Ургут туманида фаолият юритаётган 6 нафардан иборат «Ҳизб ут-Таҳрир» террористик ташкилоти аъзоларининг ғайриқонуний фаолиятига чек қўйилди.
Улар орасида муқаддам мазкур террористик ташкилот ғояларини тарғибот қилгани боис жиноий жазога маҳкум этилган шахсларнинг борлиги аниқланди.
Ҳозирда мазкур жиноят иши доирасида ушбу шахсларга нисбатан дастлабки тергов ҳаракатлари олиб борилмоқда.
Аввалроқ Сирдарёда экстремистик гуруҳ аъзоси сифатида 20 киши ушлангани, Самарқандда Сурия ва Яқин Шарқдаги террористик ташкилотларга қўшилмоқчи бўлган 14 нафар фуқаро аниқлангани ҳамда Навоийдаги қамоқхонада «Ҳизб ут-Таҳрир» тарафдори маҳкумларга террористик ғояларни тарғиб қилгани аниқлангани ҳақида хабар берилганди.
