Тошкентда вакцина ташишга мўлжалланган махсус автомобиллар фойдаланишга топширилган куниёқ ЙТҲга учради

Тошкентнинг Миробод туманидаги Нукус ва Амир Темур кўчалари кесишган чорраҳада вакциналарни ташиш учун мўлжалланган бир нечта автомобиль иштирокида йўл-транспорт ҳодисаси содир бўлди, деб хабар беради ИИВ ЙҲХББ ахборот хизмати.

Маълум қилинишича, авария 23 февраль куни соат 11:30 ларда автомобиль ҳайдовчиларидан бирининг кескин тормоз босиши оқибатида юзага келган. Машина кескин тўхташни амалга оширгани сабаб машина ортида ҳаракатланаётган яна 6 та минивэн Changan ҳам кескин тормозланишини амалга оширган.

Соғлиқни сақлаш вазирлиги матбуот хизматининг ёзишича, 23 февраль куни ЮНИСЕФ томонидан Санитария-эпидемиологик осойишталик ва жамоат саломатлиги хизмати учун 17 та музлаткичли юк машинаси ва 206 та минивэн Changan автомобиллари топширилган. Машиналарнинг умумий қиймати 2 миллион долларни ташкил этади. Ушбу маблағ Вакциналар ва иммунизация бўйича глобал альянси (GAVI) томонидан соғлиқни сақлаш тизимини мукаммаллаштириш доирасида ажратилган.

«Ҳодиса натижасида 2 та автомобиль техник шикастланган. Тан жароҳати олган фуқаролар йўқ. Мазкур ҳодиса юзасидан Тошкент шаҳар ИИББ ЙҲХБ томонидан суриштирув ишлари олиб борилиб, ҳодиса содир бўлиш сабабларига ойдинлик киритилмоқда», — дейилади идора хабарида. Мавзуга доир:

• Ўзбекистонда тез тиббий ёрдамнинг бир марталик ташрифи ўртача 150 минг сўмга тушиши маълум қилинди
• Асака туманида содир бўлган ЙТҲда тез тиббий ёрдам машинаси ҳайдовчиси вафот этди