Ўзбекистонга 16 октябрь куни амалий ташриф билан келган Чеченистон раҳбари Рамзан Қодиров Имом Бухорий номидаги Тошкент ислом институтида бўлди. Бу ҳақда «Azon.uz» хабар бермоқда.
Институт ректори У.Ғафуров меҳмонларга таълим муассасаси фаолияти тўғрисида қисқача сўзлаб берди. 3-курс талабаси Б.Нажмиддинов ҳам талабалар номидан сўзга чиқиб, таълим жараёни ҳамда институт тарихи ҳақида маълумот берди.
Рамзан Қодиров асосий бино, масжид хонақоҳи ва ахборот-ресурс марказини кириб кўрди. Марказдаги Меҳмонлар китобига таасуротларини ёзиб қолдирди.
Учрашувда А.Бобомуродзода, А.Шоший каби фахрий устозлар ҳам иштирок этиб, Рамзан Қодировнинг отаси Аҳмад Қодиров тўғрисидаги хотираларни йиғилганларга сўзлаб берди.
Маълумки, Аҳмад Қодиров 1982—1986 йилларда Тошкент ислом институтида таълим олган. «Учрашув сўнгида меҳмонлар ва йиғилганлар эсдалик учун суратга тушди», — деб ёзади «Azon.uz».
Аввалроқ Рамзан Қодиров Ўзбекистон Президенти Шавкат Мирзиёев қабулида бўлгани ҳақида хабар берилган эди.
Мавзуга доир: Рамзан Қодиров Ўзбекистонга ташрифини ташкил қилгани учун Шавкат Мирзиёевга миннатдорлик билдирди
