Eron yadrochi olimlarini xavfsiz joyga ko‘chirdi — The Telegraph

Eron Isroil hujumlaridan omon qolgan yadro olimlarini xavfsiz joylarga ko‘chirdi. Bu haqda The Telegraph xabar berdi.

Xabarga ko‘ra, Isroilning iyun oyidagi hujumlari oqibatida Eronning 30 dan ortiq yadro olimi halok bo‘lgan. Shundan so‘ng, qolgan olimlar ham nishonga olinmasligi uchun yashirilgan. Ularning ko‘pchiligi endi o‘z uylarida yashamaydi va universitetlarda dars bermaydi.

Olimlar Tehron hamda shimoliy qirg‘oq shaharlari yaqinidagi xavfsiz hududlarda, oilalari bilan birga villalarda istiqomat qilmoqda, deyiladi xabarda.

Isroil ro‘yxatida 100 ga yaqin olim borligi, ammo ulardan atigi 15 nafari tirik qolganligi aytilmoqda. Yahudiy rasmiylariga ko‘ra, bu olimlar yaqin kelajakda ikki yo‘ldan birini tanlashga majbur bo‘ladi: o‘z ishini davom ettirib, hujumga uchraydi yoki yangi kasbga o‘tadi. Oliy o‘quv yurtlarida dars bergan olimlar esa yadro dasturiga aloqasi bo‘lmagan o‘qituvchilar bilan almashtirilmoqda.

Eron olimlarini yashirish qarori Isroil bergan ma’lumotlarga asoslangan xavotir fonida qabul qilingan. Chunki yaqin kunlarda yana suiqasdlar bo‘lishi taxmin qilinmoqda. Shu hafta Eron o‘z yadro olimlaridan biri — Ruzbeh Vadini qatl etdi. U 13-avgust kuni osib o‘ldirilgan. Vadi Isroil–Eron urushi davom etgan 12 kunlik janglarda hamkasblarining o‘ldirilishiga sabab bo‘lgan ma’lumotlarni Isroilga yetkazganlikda ayblangan.

Isroillik mutaxassislar fikricha, hozirda yangi avlod yadrochi olimlari o‘z faoliyatini davom ettirishga tayyor turibdi. Eron yadro dasturi shunday tuzilganki, har bir muhim olimning kamida bitta yordamchisi bo‘ladi va ular odatda 2–3 kishilik guruhlarda ishlaydi. Bu esa hujum bo‘lganda ham ish uzluksiz davom etishini ta’minlash uchun mo‘ljallangan.