Salvador hukumati Qo‘shma Shtatlar tomonidan deportatsiya qilingan muhojirlarni, shuningdek, zo‘ravonlik jinoyatlari uchun hukm qilingan odamlarni qabul qilishga va ularni mahalliy qamoqxonaga joylashtirishga rozi bo‘ldi. Bu haqda Deutsche Welle xabar berdi.
AQSH davlat kotibi Marko Rubio va Salvador prezidenti Nayib Bukele 3-fevral kuni bo‘lib o‘tgan uchrashuvda shunday kelishuvga erishdi.
“Hozirda butun mintaqadagi vaziyatni beqarorlashtirayotgan ommaviy noqonuniy migratsiya to‘lqinlariga qarshi kurashishga qaratilgan ko‘plab kelishuvlar tuzildi”, deyiladi Vashingtondagi tashqi siyosat idorasi bayonotida.
Ushbu ma’lumotlarga ko‘ra, Bukele Salvadorning MS-13 jinoiy guruhi va Venesuelaning Tren de Aragua guruhining barcha a’zolarini qabul qilishga rozi bo‘lgan.
“Hech bir mamlakat hech qachon qilmagan favqulodda ishora sifatida prezident Bukele o‘z qamoqxonalariga xavfli amerikalik jinoyatchilarni, jumladan, AQSH fuqarolari va qonuniy rezidentlarini joylashtirishni taklif qildi”, deya ta’kidladi Davlat departamenti.
Salvador AQSHdan kelgan jinoyatchilarni mega qamoqxonaga joylashtiradi
O‘z navbatida, Salvador prezidenti ma’lum bir to‘lov evaziga AQSHdan kelgan jinoyatchilar Salvador Cecot qamoqxonasiga joylashtirilishini aytdi.
“Narxlar AQSH uchun nisbatan past, ammo biz uchun sezilarli bo‘ladi”, dedi Bukele.
40 minggacha mahbus saqlanishi mumkin bo‘lgan gigant Cecot qamoqxonasi ikki yil oldin Salvadorda uyushgan jinoyatchilikka qarshi kurash doirasida ochilgandi. Shundan so‘ng mamlakatda qotilliklar soni sezilarli darajada kamaygan.
AQSH Davlat kotibi Marko Rubio lavozimga kirishganidan keyin birinchi ishchi safarini amalga oshirmoqda. Safar doirasida u Panama va Salvadorga tashrif buyurgan. Shundan so‘ng uni Gvatemala, Kosta-Rika va Dominikan Respublikasiga borishi kutilmoqda. Ushbu mamlakatlar rahbariyati bilan muzokaralarda AQSH prezidenti Donald Tramp e’lon qilgan noqonuniy muhojirlarni ommaviy deportatsiya qilish masalasi markaziy o‘rin tutadi.
Izoh (0)