Yevropa Ittifoqi (YI) 20-may kuni Temu va Shein kabi onlayn savdo platformalaridan keladigan kichik jo‘natmalar uchun 2 yevro soliq joriy etish rejasini e’lon qildi. Bu haqda BBC xabar berdi.
Bu choralar YI bozoriga arzon, lekin sifat va xavfsizlik talablariga javob bermaydigan mahsulotlarning kirib kelishini cheklashga qaratilgan. Agar mahsulot YI ichidagi omborlarga yuborilsa, to‘lov 0,50 yevro bo‘ladi. To‘g‘ridan to‘g‘ri mijoz uyiga jo‘natilsa, 2 yevro to‘lanadi. Soliq 150 yevrodan kam bo‘lgan qiymatdagi jo‘natmalarni qamrab oladi. 2024-yilda YIga kelgan 4,6 milliard kichik jo‘natmaning 91 foizi Xitoydan, asosan, Shein va Temu kabi platformalardan yuborilgan.
Shein va Temu uchun ta’siri
Shein va Temu kabi platformalar arzon narxlari bilan mashhur bo‘lib, YI bozorida katta ulushga ega. Yangi soliq ularning biznes modeliga bevosita ta’sir qiladi, chunki bu platformalar ko‘pincha to‘g‘ridan to‘g‘ri iste’molchilarga yuborish orqali bojxona to‘lovlaridan qochadi.
Hozirda YI bo‘yicha 27 ta a’zo davlat tomonidan tasdiqlanishi kerak bo‘lgan bu taklif hali rasmiy ravishda qabul qilinmagan. Agar tasdiqlansa, yangi soliq 2026-yildan kuchga kirishi kutilmoqda.
O‘zbekiston iste’molchilari uchun qanday ta’sir qiladi?
Agar siz YI davlatlarida bo‘lib, buyurtma qilsangiz, yangi soliq to‘lovlari qo‘llanishi mumkin. Shu sababli buyurtma qilishdan oldin jo‘natma narxi va qo‘shimcha to‘lovlarni hisobga olish muhim.
Izoh (0)