Ko‘ksaroy qarorgohida O‘zbekistonga davlat tashrifini amalga oshirayotgan Mo‘g‘uliston prezidenti Uxnaagiyn Xurelsuxni rasmiy kutib olish marosimi bo‘ldi. Bu haqda Prezident matbuot xizmati xabar berdi.
Qarorgoh oldidagi maydonda faxriy qorovul saf tortdi. Shavkat Mirziyoyev oliy martabali mehmonni samimiy kutib oldi va shohsupaga taklif qildi. Harbiy orkestr ikki mamlakat davlat madhiyalarini ijro etdi.
Yetakchilar faxriy qorovul safi oldidan o‘tib, rasmiy delegatsiyalar aʼzolarini qutladilar. Birgalikda suratga tushish marosimidan so‘ng oliy darajadagi muzokaralar boshlandi.
Avvalroq Shavkat Mirziyoyevning taklifiga binoan Mo‘g‘uliston yetakchisi 23—26-iyun kunlari davlat tashrifi bilan O‘zbekistonda bo‘lishi haqida xabar berilgandi. 23-iyun kuni Uxnaagiyn Xurelsux rafiqasi Luvsandorj Bolorsetseg hamrohligida O‘zbekistonga tashrif buyurgan edi.
