Тошкент вилояти ҳокими Зоир Мирзаев бугунги кунда мактабларда оталар мажлиси жудаям камайиб кетаётганини, бироқ, оталар мажлиси бугунги кун учун аҳамиятли эканини айтди. Бу ҳақда у Ангрен шаҳридаги 17-мактабдаги оталар мажлисида гапирди.
Она ўн марта боласини тергаб, нима қиляпсан деб сўраганидан кўра, отанинг бир марта болам нима қиляпсан деб сўраши босиб кетади. Биз шунинг учун бугун оталар мажлисини чақирдик, — дейди Тошкент вилояти ҳокими Зоир Мирзаев.
Вилоят раҳбари оталар мажлиси ҳақида гапирар экан, бир болага етти маҳалла ота-она деган гапни, миллий қадриятларни бола руҳиятига сингдириш лозимлигини айтди.
Боланинг миясида бўшлиқ пайдо бўлса, у мактабда яхши ўқимаган, фанни яхши ўзлаштирмаган бўлса, диний йўл биланми ёки дунёвий йўл биланми ёт ғоялар сингдирилади. Бўшлиқ бор жойга ёт ғоя сингади. Менга ҳозир Миллий гвардия формасини кийган бир синфнинг йигит-қизларини кўрсатишди. Болалар кўзи ёниб турибди. Уларнинг ҳар бирида ғурур бор. Форма кийганидан ғурурланяпти. Ватанга керакли одам бўлганини, Ватан ҳимоячиси эканини англаяпти. Мен бошқаларга намуна бўлишим керак деяпти, — дейди ҳоким.
Зоир Мирзаевнинг айтишича, боласи йўқ бўлиб қолганда ота-она унинг қаердалигини яхши билса, у бахтли ота-она ҳисобланади.
Болангиз йўқ бўлиб қолганда, уни тополадиган жойингиз аниқ бўлса, болам китоб ўқияпти, спорт билан шуғулланяпти, теннис ўйнаяпти деб, унинг қаердалигини билсангиз, бахтли одамсиз. Лекин болангизнинг қаерга кетиши қизиқ бўлмаса, имкон қадар кетсин, уйда ўтирса кийим сўрайди, телефонга пул сўрайди, сигаретга, носга пул сўрайди десангиз у чиқиб кетади. Кўчадаги бекорчиларга қўшилади. Заҳри қотилни сотувчиларга харидор керак. Харидор ким айнан ўша бола, — дейди ҳоким.
Вилоят ҳокими мактаб ўқитувчилари ҳақида гапирар экан, илгари ўқитувчиларга нисбатан ҳурмат бошқача бўлганини эсга олди.
Ўқитувчи тўйга келса, тўйхонада бирорта бола бўлмасди. Гиламнинг орқасида ўтирар эдик. Тўйхона эгасининг ҳам болалари даврада кўринмас эди. Ҳозирчи, ҳозир ўқитувчи ва ўқувчи бирга ўтирибмиз-ку. Ким қилди шуни? Ўзимиз қилдик-да. Тўхта, устозингни ҳурмат қил демадик. Ўзимиз муаллимнинг обрўсини туширдик. Ўлдирса ҳам муаллиминг ўлдирсин деган тушунча бўлиши керак. Ва болага ўша муаллимнинг айтганини қиласан деб, мактабга юбориш керак, — деди у.
Вилоят ҳокими таклифига кўра, Ангрендаги 17-мактабда ҳар ойда бир марта оталар мажлиси чақириладиган бўлди.
Аввалроқ айнан шу мактаб, “Телефонсиз мактаб” ташаббусида ғолиб бўлгани учун, уларга 300 миллион сўм миқдорида мукофот пули берилгани хабар қилинганди.
Изоҳ (0)