Россия президенти Владимир Путин Украинанинг босиб олинган ҳудудлари — Херсон ва Запорожье вилоятларини қайтариб беришга тайёр эмас. Америка Қўшма Штатлари ва Европанинг етакчилари Путинни нотўғри тушунган. Бу ҳақда The Washington Post нашри хабар берди.
Нашрнинг Путин ва Трампнинг махсус вакили Стив Уиткофф учрашуви тафсилотларидан хабардор манбасига кўра, Владимир Путин Россия томонидан босиб олинган Херсон ва Запорожье вилоятларидаги ҳудудлардан воз кечишга тайёр эмас.
Путин 6 август куни Кремлда бўлиб ўтган учрашувда Киевдан Донбассдан воз кечишни сўраган. Бунинг эвазига эса ўт очишни тўхтатиш ва фронт чизиғини ҳозирги позицияларда музлатишга рози бўлишини айтган.
Шундан сўнг Дональд Трамп Владимир Зеленский ва бир нечта европалик етакчилар билан суҳбат ўтказган. Axios нашрининг ёзишича, қўнғироқ иштирокчиларидан баъзилари “Путин Херсон ва Запорожье вилоятларига бўлган даъволаридан воз кечишга рози бўлди” деган таассурот билан суҳбатни якунлаган.
The Washington Post суҳбатдошининг айтишича, АҚШ томони ҳам Путиннинг Запорожье ва Херсон вилоятларида ҳарбий ҳаракатларни тўхтатиш таклифини Россия қўшинларини бу ҳудудлардан олиб чиқишга тайёрлик деб қабул қилган. Бироқ Кремль босиб олинган ҳудудлардан воз кечиш ҳақида ўйламаяпти.
Уиткоффнинг кейинчалик украиналик ва европалик расмийлар билан суҳбатида Путиннинг Запорожье ва Херсон вилоятларидан чиқиб кетиш нияти йўқлиги ойдинлашган. Россия раҳбари фақатгина ҳозирги позицияларда урушни музлатишга рози бўлган.
Трампнинг махсус вакили Путиннинг “украиналикларнинг Херсон ва Запорожьедан тинч йўл билан чиқиб кетиши” ҳақидаги талабини Россия қўшинларини бу ҳудудлардан олиб чиқиш таклифи деб нотўғри тушунган.
Путин ҳанузгача Донецк, Луганск, Запорожье ва Херсон вилоятларини тўлиқ назорат қилишни истайди. У таклиф қилган нарса эса фақат қисман ўт очишни тўхтатиш — фронт ортидаги йирик шаҳарлар ва энергетика объектларига ҳужум қилмаслик.
Изоҳ (0)