Марко Рубио Франция президенти Эммануэл Макронни Исроил ва ҲАМАС ўртасидаги музокараларни бузишда айблади. Қўшма Штатлар бош дипломати бу ҳақда Eternal Word Television Network’ка берган интервьюсида маълум қилди.
АҚШ давлат котибининг таъкидлашича, Франция раҳбари “Фаластин давлатини тан олиш бўйича бир томонлама қарорини эълон қилган куни ҲАМАС билан музокаралар издан чиққан”.
“Агар мен ҲАМАС ўрнида бўлсам, ўт очишни тўхтатмаслик керак деб ўйлайман… Чунки бунинг эвазига мукофот олишимиз ва буни ғалаба сифатида кўрсатишимиз мумкин”, деди Рубио.
Рубионинг қўшимча қилишича, Парижнинг мазкур қадамидан сўнг бошқа давлатлар ҳам унга эргашиб, сентябргача сулҳга эришилмаган тақдирда, Фаластин давлатини тан олишларини маълум қилган.
Франция президенти Эммануэл Макрон Фаластин давлатини тан олиш ниятини жорий йилнинг 24 июль куни билдирди. Париж бу ҳақда расман БМТ Бош ассамблеясининг сентябрда бўлиб ўтадиган сессиясида эълон қилади.
Шундан сўнг Буюк Британия ҳам Франция билан умумий позицияни эгаллади. Лондон Ғазодаги уруш сентябргача якунланмаган тақдирда, Фаластин давлатини тан олишини билдирган. Орадан кўп ўтмай, мазкур рўйхатга Канада ҳам қўшилди.
Шунга қарамай, Исроил халқаро босимга ён бермоқчи эмас. Яҳудий давлати айни пайтда Ғазо секторини тўлиқ босиб олиш бўйича йирик ҳарбий амалиётга тайёргарлик кўрмоқда.
Изоҳ (0)