Владимир Путин билан бирга Аляскадаги саммитга келган Россия делегацияси ўз самолётларига ёнилғи қуйиш учун нақд пул тўлашга мажбур бўлди. Бу ҳақда АҚШ давлат котиби Марко Рубио NBC эфирида сўзлаб, бу ҳолатни Россияга қарши санкциялар қандай ишлаётганига мисол сифатида келтирган.
“Россияликлар Аляскага қўнганларида, ёнилғи қуйиш учун нақд пул тўлашга мажбур бўлишди, чунки улар бизнинг банк тизимимиздан фойдалана олмайдилар. Улар санкциялар оқибатларини ҳар куни ҳис қилишлари керак”, деди Рубио.
Давлат котибининг қўшимча қилишича, шунга қарамасдан санкциялар Россия-Украина урушининг боришини ўзгартирмаган.
“Бу санкциялар ноўрин дегани эмас. Бу уларнинг уруш натижасига таъсир қилмаганини англатади”, деди АҚШ давлат котиби.
Владимир Путин ва Дональд Трамп ўртасидаги музокаралар 15 август куни бўлиб ўтди. Учрашув якунлари бўйича ўтказилган матбуот анжуманида АҚШ президенти “кўп масалалар бўйича келишувга эришилгани”ни айтди, бироқ Россия ва Украина ўртасида ярашув тўғрисида келишиб бўлмаганини тан олди.
Маълум қилинишича, Россия ҳукумат ва президент маъмурияти аъзолари, шунингдек, Кремль журналистларидан иборат делегациясига Анкорижга бориш учун камида учта самолёт керак бўлган.
NBC ҳисоб-китобларига кўра, фақат битта “Россия” самолётини ёқилғи билан тўлдириш бир галлон авиакеросин нархини ҳисобга олган ҳолда тахминан 85 минг долларга тушиши мумкин. Путин делегацияси учун одатда жами учта самолёт ишлатилади.
“Путиннинг самолёти 152 620 литр сиғимга эга. Халқаро ҳаво транспорти ассоциацияси (IATA) Jet Fuel Price Моnitor маълумотларига кўра, сўнгги пайтларда бир галлон авиаёнилғи (тахминан 3,8 литр) нархи 2,10 АҚШ доллари атрофида бўлган. Демак, битта самолёт учун Россия тахминан 85 минг доллар тўлаган бўлиши мумкин”, дея таъкидлайди Америка телеканали.
Изоҳ (0)