Беларусь президенти Александр Лукашенко ҳокимиятда “бир оз ушланиб қолгани” сабабини янги авлод раҳбарларини тайёрлаш билан боғлади. Бу ҳақда у Минскдаги Халқаро кўргазма марказининг очилиш маросимида айтди.
Сизларга ваъда берганим каби: амалда янги авлод ҳокимиятга келтирилди. Аммо мен бир оз ушланиб қолдим, лекин сабр қилинглар, ахир тажрибали одамлар ҳам бўлиши керак, деди президент.
Лукашенко фуқаролар ўз иш жойларида бурчларини адо этиши лозимлигини айтди. Сиёсатчининг айтишича, у “ўз масалалари” билан шуғулланади, ҳукумат иқтисодий муаммоларни ҳал қилади, президент администрацияси эса дипломатия билан машғул бўлади. У “бу тизим узилишларсиз ишлаши шарт”, дея таъкидлади.
Ҳозирда Лукашенконинг еттинчи президентлик муддати давом этмоқда, у 1994 йилдан буён Беларусь раҳбари ҳисобланади. 2004 йилда мамлакатда ўтказилган референдум натижасида конституциядан давлат раҳбари лавозимини кетма-кет икки муддатдан ортиқ эгаллаш имкониятини чекловчи модда чиқариб ташланган.
2020 йилда Беларусда президентлик сайловларидан кейин оммавий норозилик намойишлари бошланган, уларнинг иштирокчилари Лукашенконинг ғалабасини тан олишдан бош тортган. Минглаб намойишчилар ва хавфсизлик кучлари тўқнашган, бир неча киши ҳалок бўлган.
Бу акциялар корхоналарга ҳам тарқалган, намойишлар мамлакат ялпи ички маҳсулотининг 27 фоизини ташкил этувчи камида 30 та йирик корхонага таъсир кўрсатган.
Ҳукумат кенг кўламли норозиликларга оммавий қатағонлар билан жавоб берган, дейилади БМТ Инсон ҳуқуқлари бўйича Олий комиссари бошқармаси ҳисоботида.
Ўша сайловда блогер Сергей Тихановский, банкир Виктор Бабарико ва тадбиркор Валерий Сепкало ўз номзодини қўймоқчи эди. Учаласи ҳам ҳибсга олинган, Тихановский ўрнига унинг рафиқаси Светлана Тихановская сайловда қатнашган.
Беларусь Марказий сайлов комиссияси маълумотларига кўра, Лукашенко 80,1 фоиз (4,66 млн) овоз, Тихановская эса 10,12 фоиз (588,6 минг) овоз олган.
Изоҳ (0)