Германия, Буюк Британия, Франция ва АҚШ Украинага етказиб берилган қуроллардан узоқ масофага зарба беришда фойдаланиш бўйича қўйилган чекловларни олиб ташлади. Бу ҳақда Германия канцлери Фридрих Мерц маълум қилди.
Украинага етказиб бериладиган қуролларнинг отиш масофасига энди ҳеч қандай чеклов йўқ. На Буюк Британия, на Франция, на биз томонимиздан. Америкаликлар томонидан ҳам чеклов мавжуд эмас, деди Мерц.
Таъкидланишича, Германия Украинани қўллаб-қувватлашни давом эттириш учун “барча имкониятларни ишга солади”. Айнан шу сабабли у яқинда Буюк Британия бош вазири Кир Стармер, Франция президенти Эммануэл Макрон ва Польша бош вазири Дональд Туск билан бирга “кўнгиллилар коалицияси” доирасида Украинага ташриф буюрганини айтди.
Канцлерга кўра, чекловларнинг олиб ташланиши Украинага, масалан, Россиядаги ҳарбий позицияларга ҳужум қилиш йўли билан, ўзини ҳимоя қилиш имконини беради. У бундай ҳолатлар илгари жуда кам ҳоллардан ташқари кузатилмаганини айтди.
Кремль муносабати
Агар бундай қарорлар ҳақиқатан ҳам мавжуд бўлса, улар бизнинг сиёсий келишувга эришиш ва ҳозирда келишув доирасида амалга оширилаётган саъй-ҳаракатларимизга мутлақо зиддир, деди Россия президенти матбуот котиби Дмитрий Песков. У узоқ масофали қуролларга чекловларни олиб ташлаш “етарлича хавфли ечим” эканини таъкидлади.
Ғарб давлатлари ҳарбий ҳаракатлар давомида Украинага узоқ масофали қуроллар етказиб берган бўлса-да, улардан фойдаланишга чекловлар қўйиб, Россия ҳудудига зарба беришни тақиқлаб келган.
2024 йил ноябрь ойида АҚШнинг ўша пайтдаги президенти Жо Байден илк бор Украинанинг Россия ҳудудидаги нишонларга зарба бериши учун узоқ масофали ATACMS ракеталаридан фойдаланишига розилик берди. Шунингдек, Буюк Британия ва Франция ҳам узоқ масофага учувчи Storm Shadow қанотли ракеталаридан фойдаланишга қўйилган чекловларни бекор қилгани ҳақида хабар тарқалганди. Бироқ Ғарб мамлакатлари ҳукуматлари бу маълумотни расман тасдиқламаганди.
Изоҳ (0)