Испанияда юз берган электр энергиясидаги узилишлар мамлакат иқтисодиётига миллиардлаб зарар етказди

Испанияда кенг кўламли электр энергияси узилиши мамлакат иқтисодиётига жиддий зарба берди. Экспертларнинг дастлабки баҳолашларига кўра, йўқотишлар 1 млрд евродан 4,5 млрд еврогача бўлиши мумкин. Бу ҳақда RTVE телерадиокомпанияси хабар бермоқда.

Гранада университети иқтисодиёт профессори Франциско Родригеснинг айтишича, 4,5 млрд евролик йўқотишлар мамлакатнинг кунлик ЯИМига тенг, бироқ у бундай сценарийни эҳтимолдан йироқ деб ҳисобламоқда.

Мутахассислар ҳақиқий йўқотишлар кунлик ЯИМнинг 25 фоизидан 50 фоизигача, яъни 1,1 млрд евродан 2,25 млрд еврогача бўлиши мумкинлиги ҳақида бир фикрга келишмоқда. Бу эса йиллик ЯИМнинг 0,05-0,15 фоизига тенг дегани.

Айниқса, Испания иқтисодиётининг иккинчи муҳим тармоғи бўлган ишлаб чиқариш саноати катта зарар кўрган. Seat, Эбро ва Форд автомобиль ишлаб чиқарувчи заводлари, шунингдек Репсол ва Петронор нефтни қайта ишлаш корхоналари тўхтаб қолган.

Энг сезиларли зарар транспорт соҳасида қайд этилган. Темир йўл қатнови оммавий узилишлари ва аэропортлар фаолиятидаги чекловлар логистиканинг издан чиқишига олиб келган. Минглаб одамлар уйларига пиёда боришга ёки вокзалларда тунашга мажбур бўлган.

Мамлакат ишлаб чиқариш тузилмасининг деярли 100 фоизини ташкил этувчи кичик ва ўрта корхоналар ҳам сезиларли зарар кўрган. Профессионаллар ва мустақил ишчилар иттифоқининг ҳисоб-китобларига кўра, тадбиркорлар кунига ўртача 650 евро йўқотган. Секторнинг умумий зарари эса 1,3 млрд еврога етиши мумкин.

Баъзи ҳудудларда алоқа ва интернет билан боғлиқ муаммолар давом этаётган бир пайтда, экспертлар энг кўп зарар кўрган соҳаларни зудлик билан баҳолаш ва компенсация чораларини кўриш зарурлигини таъкидламоқда.

28 апрель куни Испанияда кенг кўламли электр энергияси узилиши содир бўлди. Бу носозлик Португалия, Франция ва Андоррага ҳам таъсир кўрсатди. Оқибатда темир йўл қатнови тўхтаб, жамоат транспорти ҳаракати издан чиқди. Испания Ички ишлар вазирлиги бу ҳодиса туфайли фавқулодда ҳолат эълон қилди. 29 апрель куни Испанияда электр таъминоти тикланди.

Европа Иттифоқининг Киберхавфсизлик агентлиги (ENISA) тахмин қилишича, носозликка кескин кучланиш ўзгаришлари сабаб бўлган бўлиши мумкин.