Эрон президенти Маъсуд Пезешкиён мамлакат Исроил билан урушга тайёрлигини ва ядро дастури давом эттирилишини маълум қилди. Бу ҳақда Al Jazeera хабар берди.
Президент мамлакатлар ўт очишни тўхтатиш борасида оптимистик муносабатда эмаслигини айтган. Пезешкиён бу ҳақда 23 июль куни эфирга узатилган Al Jazeera телеканалига берган эксклюзив интервьюсида маълум қилган. Раҳбарнинг оммага интервью бериши Исроил билан 12 кунлик уруш тугаганидан бери биринчиси бўлди.
“Биз Исроилнинг ҳар қандай янги ҳарбий ҳаракатига тўлиқ тайёрмиз. Қуролли кучларимиз Исроилга зарба беришга шай. Эрон 12 кунлик урушни якунлаган ўт очишни тўхтатиш келишувига таянмаяпти. Биз бу борада унчалик оптимист эмасмиз”, деди Пезешкиён Al Jazeera телеканалига берган интервьюсида.
Эрон раҳбари мамлакат ҳар қандай эҳтимолий сценарий ва жавобга тайёрлигини маълум қилган. Шунингдек, Исроил 12 кунлик уруш давомида давлатга етган зарарни яшираётгани билдирилган. Президентнинг қўшимча қилишича, Исроилнинг зарбалари “Эрон иерархиясини йўқ қилишга интилган, лекин буни умуман уддалай олмаган”.
Маълумот учун, июнь ойида бўлиб ўтган Исроил—Эрон ўртасидаги урушда Теҳрон тарафдан 900 дан ортиқ одам ҳалок бўлган, уларнинг кўпчилиги тинч аҳоли. Исроилда эса 28 киши қурбон бўлгани айтилган. Томонлар 24 июнь куни АҚШ воситачилигида ўт очишни тўхтатишга келишиб олганди.
Пезешкиён, шунингдек, Эрон халқаро қаршиликларга қарамай, уранни бойитиш дастурини давом эттиришини ва ядровий имкониятларни ривожлантириш халқаро қонунлар доирасида амалга оширилишини айтган.
“АҚШ президенти Дональд Трамп Эрон ядро қуролига эга бўлишини хоҳламайди. Бу фикрга қўшиламиз, чунки биз ядро қуролидан воз кечдик. Бу бизнинг сиёсий, диний, гуманитар ва стратегик позициямиздир. Эрон дипломатияга ишонади, шунинг учун келажакдаги ҳар қандай музокаралар икки томонга ҳам фойда келтириши керак. Биз таҳдид ва буйруқларни қабул қилмаймиз”, дея қўшимча қилган Эрон раҳбари.
Изоҳ (0)