Филиппинда бир ҳафтадан буён давом этаётган тропик бўрон оқибатида 25 киши ҳалок бўлди. Тошқин ва кўчкилардан зарар кўрган қишлоқлардан 278 минг киши эвакуация қилинди. Бу ҳақда Arab News хабар берди.
Мамлакат расмийларига кўра, 25 нафар қурбонларнинг аксари тошқин, дарахт синиши, кўчки ва электр токи уриши оқибатида ҳалок бўлган. Яна 8 киши бедарак йўқолгани маълум қилинган. Орол бўйлаб 3 мингга яқин турар жой бинолари яроқсиз ҳолга келган.
Бўрон Cо май деб аталиб, ундаги шамол тезлиги 24 июль куни кечқурун Пангасинан провинциясидаги Агно шаҳрида соатига 120-160 километрга етган. Шундан сўнг, тўфон шимоли-шарққа силжиб, унинг тезлиги 100 километр соатга тушган. Тўфон мамлакатдаги давом этаётган мавсумий муссон ёмғирларини кучайтириб юбормоқда.
Филиппин ҳукумати кетма-кет 3 кунга пойтахт Маниладаги мактабларни ёпган. Яна 35 та провинцияда ҳам дарслар тўхтатилган. 77 та шаҳар ва қишлоқларда, асосан Лузонда, фақвқулодда ҳолат эълон қилинган. Бу озиқ-овқатга бўлган талабни кучайтириб юборган. Расмийлар эса маҳсулот нархларини, жумладан гуруч нархини музлатиб қўйган.
Денгиз ва ҳаво йўллари орқали ҳаракатланиш чеклаб қўйилган. Фавқулодда қидирув-қутқарув ишларига минглаб армия кучлари, полиция, қирғоқ қўриқлаш хизмати ходимлари, ўт ўчирувчилар ва кўнгиллилар жалб қилинган.
Мамлакат президенти Кичик Фердинанд Маркос 24 июль куни Ризал провинциясидаги бошпаналардан бирига ташриф буюриб, эвакуация қилинганларга озиқ-овқат улашишда қатнашган. Кейинчалик у табиий офатларни бартараф этиш бўйича масъуллар билан фавқулодда йиғилиш ўтказиб, ушбу ҳодисаларга мослашиш ва қарши чоралар кўриш масалаларини муҳокама қилган. Маниланинг узоқ йиллик иттифоқчиси бўлган АҚШ, агар фалокат кучайиб борса, аҳолига ёрдам етказиб бериш мақсадида ҳарбий самолётлар тақдим этишини билдирди.
Тинч океани ва Жанубий Хитой денгизи оралиғида жойлашган Филиппинни ҳар йили 20 га яқин тайфун ва бўронлар қуршаб олади. Бу ерда тез-тез зилзилалар содир бўлади. Чунки оролда 20 га яқин фаол вулқонлар мавжуд.
Изоҳ (0)