Кипр сўнгги 50 йилликдаги энг йирик ўрмон ёнғинлари билан курашмоқда. Бугунгача мамлакат ҳудудида 120 квадрат километр майдон ёниб кетди. Бу ҳақда Euronews хабар берди.
Ўт ўчирувчиларнинг хабар қилишича, 23 июль куни ёнғиндан зарар кўрган қишлоқ тепаликларидан бирида куйган машина ва унинг ичида 2 кишининг жасади топилган. Яна 2 киши жиддий куйиш жароҳатлари билан Никосия бош касалхонасига олиб кетилган. Уларнинг аҳволи оғир деб баҳоланмоқда. Ҳаммаси бўлиб 10 киши жароҳатланган. Шунингдек, ёнғин оқибатида 14 километр узунликдаги тоғли ҳудудда 14 та қишлоқ аҳолиси эвакуация қилинган. Лофоу қишлоғида камида 20 та уй вайрон бўлгани айтилди.
Ҳукумат расмийлари 24 июль куни эрталаб фаол ёнғинлар бартараф этилганини маълум қилган бўлса-да, кейинчалик баъзи ҳудудларда ёнғин қайта алангаланган. Жумладан, шу куни тушдан кейин ғарбий Пафос туманида яна ўрмон ёнғинлари қайд этилган.
Мутахассислар кундузи қаттиқ шамол эсиши ва жазирама иссиқ билан қўшилиб, вазият янада хавфли тус олишидан огоҳлантирди. Ҳозирда кўплаб йўллар ёпиқлигича қолмоқда, фуқароларни қутқариш ишлари давом этмоқда. 250 дан ортиқ ўт ўчирувчи ёнғинни ўчириш билан шуғулланаётгани хабар қилинди. Шунингдек, 18 та самолёт ҳаводан ёрдам бермоқда.
Юқорида айтилганидек, 23 июль куни бошланган ўрмон ёнғинлари камида 120 квадрат километр майдонни кул қилган. Бу ер майдони орол қуруқлик ҳажмининг 1 фоизидан кўпроғини ташкил этади. Сўнгги маротаба йирик ёнғинлар 1974 йили орол турк ҳарбийлари томонидан босиб олинганда содир бўлганди. Ўшанда 260 квадрат километрга яқин майдон ёниб кетган.
Хорижий ёрдам
Кипр ҳукумати матбуот котиби Константинос Летимбиотиснинг айтишича, мамлакат бошқа давлатлардан ёрдам сўраган.
“Испания 2 та ёнғин ўчириш самолётини юбормоқда. Иордания эса 2 та вертолёти билан ёрдам кўрсатишга бел боғлади. Буюк Британия ҳам ўзининг ҳарбий самоётларини ёнғинни ўчиришга сафарбар қилди. Бу орада Исроил 24 июль куни кечқурун ўз самолётларини юборишини маълум қилди”, деди матбуот котиби.
Изоҳ (0)