Фарғона вилоятида оғир юк ташувчи автотранспорт воситалари ҳаракати вақтинча чекланди. Бу ҳақда 28 июлда вилоят ҳокимининг тегишли қарори қабул қилинди.
“Фарғона вилоятида экстремал иқлим шароитларида, хусусан, ҳаво ҳарорати кўтарилиб кетган шароитларда йўлларнинг ва йўл сунъий иншоотларининг техник ҳолатини сақлаб туриш тўғрисида”ги қарорга кўра, 2025 йил 20 июлдан 20 октябргача вилоят ҳудудидан ўтган умумий фойдаланишдаги автомобиль йўллари, шаҳарлар ва бошқа аҳоли пунктларининг кўчаларида оғир юк ташувчи автотранспорт воситаларининг ҳаракати ҳар куни соат 08:00 дан 18:00 гача чекланди.
Ушбу чеклов автомобиль йўлларида ташишда транспорт воситасининг ғилдирак ўқига тушадиган оғирлиги 10 тонна ва ундан ортиқ бўлган юк автомашиналари, ёнғинга чидамли бўлмаган ёки муҳит учун хавфли юк ташувчи транспорт воситалари, бошқа махсус талабларга жавоб бермайдиган оғир автотранспортларига тааллуқли этиб белгиланди.
Тез тиббий ёрдам, ўт ўчириш ва фавқулодда ҳолатлар хизматларига тегишли транспорт воситалари, коммунал ва саноат хизматларини таъминловчи махсус транспортлар, рухсатномага эга бўлган маҳаллий тадбиркорлик субъектларининг маҳсулот етказиб бериш воситаларига (фақат махсус белгилар билан) мазкур чеклов татбиқ этилмайди.
“Йўл ҳаракати тўғрисида”ги қонуннинг 15-моддасида экстремал иқлим шароитларида, хусусан, ҳаво ҳарорати кўтарилиб кетган шароитларда йўлларнинг ва йўл сунъий иншоотларининг техник ҳолатини сақлаб туриш мақсадида сутканинг муайян вақтида Н2, Н3 ва М3 тоифасидаги транспорт воситаларининг ҳаракатланишини чеклаш тўғрисида ЙҲХХга таклифлар киритиш мумкинлиги белгиланган.
Изоҳ (0)