WhatsApp муҳим хабарларга жавоб беришни унутмасликка ёрдам берувчи янги функцияни синовдан ўтказмоқда. Эндиликда чатни юқорига бириктириб қўйиш, юлдузча билан белгилаш ёки хотирага таяниш ўрнига, бевосита айнан шу хабарга эслатма ўрнатиш мумкин бўлади.
Янги функция WhatsApp фойдаланувчиларининг доимий муаммосига айланган ҳолат — муҳим хабарга кейинроқ жавоб беришни унутиб юборишни ҳал қилишга мўлжалланган. У аллақачон WhatsApp’нинг сўнгги бета-версиясида Android қурилмалар учун мавжуд.
Функциядан фойдаланиш учун керакли хабар чатини босиб ушлаб туриш, “Эслатма” (Remind) тугмасини танлаш ва таймерни созлаш кифоя. Фойдаланувчи 2, 8, 24 соатга ёки исталган вақтда эслатма қўйиш мумкин. сўнг белгиланган хабар ёнида қўнғироқча белгиси пайдо бўлади ва вақт тугагач, илова шу хабар матни билан эслатма юборади.
Шунингдек, WhatsApp автоматик эслатмалар устида ҳам тажриба ўтказмоқда. Илова фойдаланувчи энг кўп мулоқот қиладиган чатлардан келган, лекин ўқилмаган хабарлар ҳақида ўзи мустақил равишда билдиришнома юборади.
Мазкур функция Android ва iOS’нинг барча версияларида қачон пайдо бўлиши ҳозирча номаълум.
Изоҳ (0)