Қўшма Штатларнинг Исроилдаги элчиси Майк Хакаби Ғарбий Соҳилдаги черковга қилинган ҳужумни “теракт” деб атади ва айбдорларни жавобгарликка тортишга чақирди.

Элчи Хакабининг айтишича, у Тайбе шаҳрига бориб, исроиллик кўчманчилар томонидан 8 июль куни ўт қўйилган қабристон ва V асрга оид черковни кўздан кечирган.
“Бу террорчилик ҳаракати ва жиноятдир. Тайбеда ёки бошқа жойда бундай ҳужумларни амалга оширганлар топилиб, жавобгарликка тортилиши шарт. Шунчаки огоҳлантириш етарли эмас”, деди Хакаби ўз баёнотида.
Хакаби бундан бир неча кун олдин ҳам Ғарбий Соҳилдаги яҳудий кўчманчилар томонидан калтаклаб ўлдирган фаластинлик-америкалик йигитнинг ўлими юзасидан “агрессив тергов” талаб қилган ва ҳодисани “жиноят ва террорчилик ҳаракати” деб баҳолаган эди.

Трамп маъмуриятининг позицияси
Майк Хакаби Исроил ҳукумати томонидан яширинча дастакланадиган яҳудий кўчманчилари посёлкаларининг ашаддий тарафдори ҳисобланади. Шунга қарамай, унинг бу фикрлари Дональд Трамп маъмуриятининг Исроилга қарши камдан-кам учрайдиган кескин баёнотларидан биридир.
Дональд Трамп ҳокимиятга келган январь ойидаёқ исроиллик кўчманчилар ва гуруҳларга нисбатан собиқ президент Байден даврида қўйилган санкцияларни бекор қилган эди.
Зўравонлик кучаймоқда
Ғарбий Соҳилда исроиллик кўчманчиларнинг фаластинликларга ҳужумлари 2023 йилнинг 7 октябрь санасидан буён янада кучайди. Бироқ босиб олинган ҳудудлар бўйлаб зўравонлик ҳолатлари ундан олдин ҳам кенг тарқалган эди.

БМТ судининг энг юқори инстанцияси ўтган йили Исроил томонидан 1967 йилги урушда эгалланган ҳудудлар, жумладан Ғарбий Соҳилда қурилган посёлкаларни ноқонуний деб топди. Тель-Авив эса, табиийки, ўзига қўйилган айбловларни рад қилади.
Изоҳ (0)