Президент 7 август куни “Электр энергетикаси тўғрисида”ги қонунни имзолади.
Қонун электр энергетикаси соҳасидаги муносабатларни тартибга солади. Ушбу қонун 10 июль куни Сенат томонидан маъқулланганди.
Электр энергетикаси соҳасини давлат томонидан тартибга солишни қуйидагилар амалга оширади:
- Вазирлар Маҳкамаси;
- Энергетика вазирлиги;
- Энергетика бозорини ривожлантириш ва тартибга солиш агентлиги;
- Электр энергияси, нефть маҳсулотлари ва газдан фойдаланишни назорат қилиш инспекцияси;
- маҳаллий ижро этувчи ҳокимият органлари.
Вазирлар Маҳкамаси электр энергетикаси соҳасида ягона давлат сиёсати амалга оширилишини таъминлайди. Энергетика вазирлиги электр энергетикаси соҳасидаги махсус ваколатли давлат органидир.
Қуйидагилар электр энергияси бозорининг иштирокчиларидир:
- электр энергияси бозори оператори;
- ишлаб чиқарувчи;
- электр энергиясини сақлаш тизими оператори;
- узатиш тизими оператори;
- марказий харид қилувчи;
- трейдер;
- тақсимлаш тизими оператори;
- таъминотчи;
- истеъмолчи.
Тарифлар ва тўловларни белгилаш услубияти ҳамда унинг асосида тартибга солинадиган тарифлар ва тўловлар Энергетика бозори регулятори томонидан белгиланади. Қабул қилинган тарифлар ва тўловлар кучга киришидан камида 15 кун олдин эълон қилинади. Ҳеч қандай тариф ёки тўлов орқага қайтиш кучига эга эмас.
Амалдаги қонун 2009 йилда қабул қилинган бўлиб, унда электр энергиясининг улгуржи ва чакана бозори, жумладан, соҳада рақобатни қўллаб-қувватлаш механизмлари назарда тутилмаган. Шу билан бирга, электр таъминотининг ишончли, хавфсиз, барқарор ҳамда кам харажатли ишлашини таъминлайдиган нормалар акс эттирилмаган.
“Мобил алоқада хизмат кўрсатадиган компанияни танлаганингиздек энергия сотадиган компанияни ҳам танлаш ҳуқуқингиз бўлади. Энергия ишлаб чиқарувчи ва сотувчи компаниялар орасида рақобат бўлади. Амалдаги қонунда бу тақиқланган эди”, — деган эди Алишер Қодиров.
Янги таҳрирдаги қонун расмий эълон қилинган кундан эътиборан 3 ой ўтгач кучга киради.
Изоҳ (0)