Гренландиянинг энг баланд нуқтасида жойлашган Summit Cаmp илмий-тадқиқот станцияси 2021 йил 14 –август куни етти соат тўхтовсиз давом этган ёмғирни қайд этди, ёмғир кейин қорга айланган. Қор ва муз бўйича маълумотлар миллий марказига кўра, бу денгиз сатҳидан 3216 метр баландликдаги Гренландияда илмий кузатувлар тарихида қайд этилган биринчи ёмғир.

Фото: Shutterstock

Ёмғир ҳавонинг кучли исишидан келиб чиққан, ҳудудда ҳарорат тўққиз соат давомида мусбат бўлиб турган. Бу ҳолат аввал ҳам кузатилган — охирги 10 йил ичида учинчи марта ҳаво ҳарорати 0 дан юқори бўлди, лекин ҳозирги ҳароратнинг кўтарилиши шунчалик узоқ давом этганидан Гренландия муз қатламининг энг юқори нуқтасида ёмғир ёғишига олиб келди. Гренландияда ёмғир ёғиши ва ғайритабиий илиқ ҳаво туфайли 14—16 август кунлари жами 872 минг квадрат километр майдонда музликлар эриб кетди.

Бундан икки ҳафта олдин ҳам, Гренландияда иссиқ ҳаво тўлқини туфайли музликларнинг катта қисми эриган эди. Ҳарорат мавсумий меъёрдан 2,5 баравар юқори бўлган — метеорологик станциялар оролнинг энг шимолида 20 градусни, шимоли-шарқда эса рекорд даражадаги 23,4 градусни қайд этган. Шу сабабли Гренландия бир ҳафта давомида кунига саккиз миллиард тоннадан муз йўқотди — бу ёздаги ўртача меъёрдан  икки баравар кўп.

Олимлар ушбу ғайритабиий ҳодисаларнинг сабабини глобал исиш деб атамоқда: иқлим ўзгариши туфайли, Ер қутбларининг атрофида жойлашган минтақаларда ўртача ҳарорат ўрта ва қуйи кенгликларга қараганда икки-уч баравар тез кўтарилиб бормоқда.

Аввалроқ Гренландиядаги энг катта музлик бўлакларга бўлиниб кетгани тўғрисида хабар берилганди.