SpaceX космик компанияси асосчиси ва Tesla бош директори Илон Маск бир кунда 16,5 миллиард доллар йўқотиб, дунёнинг энг бадавлат инсонлари қаторида 8-ўринга тушиб кетди. Бу ҳақда миллиардерларнинг бойлигини реал вақтда кузатиб бораётган Forbes Real-Time рейтингидаги маълумотларда келтирилган.
8 сентябрь куни электромобиллар ишлаб чиқарувчи Tesla акциялари нархи кескин тушиб кетган. Тушиб кетган нархларнинг энг юқори нуқтаси 19,68 фоизни ташкил этган бўлса, қоғозлар нархи 335,99 долларга қадар тушган. Бу компаниянинг S&P 500 индексидан жой ололмагани сабаб содир бўлган. S&P Dow Jones Indices қўмитаси 5 сентябрь куни Tesla акцияларини сабабсиз S&P 500’га киритишдан бош тортган. Бу каби қарор автомобиль ишлаб чиқарувчи индексдан жой олиш учун барча талабларни бажарганига қарамай қабул қилинган.
Эслатиб ўтамиз, Илон Маск 10 июль куни дунёнинг энг бой одамлари рўйхатида 7-ўринга, 20 июль куни 5-ўринга, 17 август куни эса 4-ўринга, 1 сентябрь куни эса Цукербергни ортда қолдириб, дунёнинг энг бой одамлари учлигидан жой олганди.
Эндиликда рейтингда Маскдан юқорида Oracle асосчиси Ларри Эллисон, ҳиндистонлик бизнесмен Мукеш Амбани, Berkshire Hathaway директорлар кенгаши раиси Уоррен Баффетт, Facebook асосчиси Марк Цукерберг, Microsoft асосчиси Билл Гейтс, LVMH бош директори Бернар Арно ва Amazon корпорацияси раҳбари Жефф Безос турибди.
49 ёшли Маск Tesla акцияларининг бешдан бир қисмига эгалик қилади. Электромобил ишлаб чиқарувчининг акциялари йил давомида 200 фоиздан ортиқроққа ўсган.